
Cinîyê Sûrî: Keda destê ma verê çimanê ma de rijnenê 

2018-01-02 12:57:03


	&nbsp;

	Rojda Aydin

	&nbsp;

	AMED - Her ke roj derbaz beno kîn û nefretê şarê taxê Alîpaşa û Lalebeyî girs beno. Keyeyê ke taxa Sûr de cuyenê vatî ke keyeyê ke bi kede destê xo viraştê yenê rijnayîş.

	&nbsp;

	Sûr de 24ê Gûlane de qerarê rijnayîşê taxê Alîpaşa û Lalabey ame dayîş. Taxan de nîme ra zêde keyeyî ameyî rijnayîş û otelê butîk yenê awankerdiş. Keyeyê ke nê taxan de cuyenê, her ke şino kîn û nefretê înan girs beno. Keyeyan ard ziwan ke keyeyê ke bi keda destê xo viraştê yenê rijnayîş.

	&nbsp;

	Cinîya bi nameya Zerîfe Garbun (38) ke taxa Alîpaşa de cuyena, dimayê ke bi zor keye ra vetê û keyeyê ci rijnayê Zerîfe nika kîra de nişnena ro û wina qalî xo kerde: "Ez Sûr de niştêne ro û keyeyê mi zî taxa Elîpaşa de bi. Ma keye de 10 kes bî û ma bi tehdîtan keyeyî ma ra vetî û rijnayî. Na taxe de kesê ke halê înan ekonomî baş nêbi cuyayne. Labelê dewlete nêverda û bi zor şarî taxe ra vet. Mêrdeyê mi zî nêweş o. Dimayê ke keyeyê ma ameyî rijnayîş ma uca ra nêvejyayî û ma nêzdîyê taxe xo keyeyêke kîra kerd. Labelê dewlete uca de zî rehetî nêda ma. Ma nika reyna mîyanê Sûrî de xo rê keye kîra kerd û cuya xo ma dewam kerd. Ez do heta mergê xo Sûr ra nêvejî."

	&nbsp;

	'Ma nêverdenê ke keda ma verê çimanê ma de birijnê'

	&nbsp;

	Cinîya bi nameyê Safîye Kizilay (40) zî ard ziwan ke înan bi zor keye ra vejenê û qiseykerdişê xo wina dewam kerde: “Ma nêwazenê ke taxa xo ra û Sûr ra vejyê. Nê keyeyê ke ameyî rijnayîş, bi keda ma ameybî viraştiş. Keyeyê ke mendê zî wazenê birijnê. Se kenê wa bikerê ma do Sûr ra nêvejîyê û têkoşînê xo dewam bikerê."

	&nbsp;

	Wayîr vîrardişê xo vejêna

	&nbsp;

	En peynî zî cinîya bi nameyê Fatma Beytekîne (50) maya 4 domanan a va ke taxa Alîpaşa de, keyeyê ke maya xo ra bîya û verê ke maya aye cuya xo vinî bikero, keye ser ê nameyê aye de bîyo. Labelê dimayê ke maya aye cuya xo vinî kerda, Fatma, wayê û birayê ci semedê vîrardişê maya xo rê wayîr vejyê nika pîya eynî keye de cuyenê. Fatma ke 50 serre yo taxa Alîpaşa de cuya xo dewam kena la semedê tehdîdê dewlete mecbur menda ke fek keyeyê xo ra vera bido.

	&nbsp;