Kurdistan de nameyê Kurdistanî qedexe yo 

2017-12-30 11:46:28


	 

	Zeynep Turgut

	 

	COLEMÊRG - Tirkîya de bi serran o sîyasetmedar ya zî şar semedo ke nameyê Kurdîstanî xebitnayê, ya ameyê tepiştiş ya zî derheqê înan de dewa ameyî akerdiş. Qedexebîyayîşê nameyê Kurdîstanî hîna dewam keno. Serran ê 90an de keyeyê ke waştêne nameyê Kurdistanî bidê domananê xo, bi astengîyê mudurê nifûsî dir rî bi rî mendêne û nameyê domananê înan goreyê waştişê mudurê nifûse ameyne vurnayîş. Bêtehemulîyê hemverê nameyê Kurdî û Kurdîstanî hema zî dewam keno.

	 

	Tirkîya de bi serran o qedexekerdişê nameyê 'Kurdistan' dewam keno. Serrê 90an ra heta nika keyeyê ke waştêne nameyê 'Kurdistan' bidê domananê xo, hetê mudurê nifûse ra nêameyo qebulkerdiş û mudurê nifûse goreyê waştişê xo nasname de name vurnayê. Bêguman Kurdîstan de her keyeyêke  'Kurdistanêke' esto. Her çiqas mudurê nifûse nameyê Kurdistanî qebul nêkero zî kurdî fek nameyê 'Kurdistan' vera nêdê û domanê înan bi nameyê Kurdistan pîl benê. Heto bîn ra Tirkîya de heta nika sîyasetmenderan bigîrê heta şar semedo ke nameyê 'Kurdîstan' xebitnayê ya derheqê înan de ya dewa ameyê akerdiş, ya zî ameyê tepiştiş. Tedayê dewlete yê hemverê nameyê kurdî û Kurdistanî hîna dewam kenê. Serra 2013an qezaya Hîlvanî keyeyê Yunus û Elîfa ke waştêne nameyê domana xo ya 1,5 serre bikerê 'Kurdistan' hetê mudirîyê nifûse ra semedo ke nameyê 'Kurdistan' qedexe bi, nêamebi qebulkerdiş û nameyê domana înan bi nameyê 'Hêlîn' amebî vurnayîş û dimayê têkoşînêke girs 'Kurdistan' hetê dadgeha berze ra ame qebulkerdiş û nasname de Kurdistan ame nusnayîş. Her çiqas no qerarê dozgerîya berz bibi tarîxî zî hema qedexekerdişê nameyê 'Kurdîstan' dewam keno.

	 

	'Bê waştişê keyeyî nasname de namey mi kerdî Zubeyde'

	 

	Colemêrg de cinîya bi nameyê Zubeyde Tunç bi nameyê xo bîn Kurdistane zî serra 1995an de eynî problem cuyaya. Zubeyde serra 1995an de maya xo ra bena. Zubeyde wexto ke çimê xo dinya rê akena, keye wazeno ke nameyê domana xo bikerê Kurdistan la mudirê nifûsê qebûl nêkeno û keye ra vanê nameyêke bîn weçînê. Mudirê nifûse goreyê waştişê xo nameyê Kurdistane nasname de kenê Zubeyde. Her çiqas nameyê Kurdistane qebûl nêkerê zî û nasname de bikerê Zubeyde zî keye fek nameyê Kurdistan ra vera nêdano û her kesî ra vanê nameyê domana ma Kurdistan a. Zubeyde nika 23 serre ya û her kes aye bi nameyê Kurdistane nas keno. Zûbeyde dîyar kerde ke nameyê Kurdistan ra hîna hes kena û wina qisey kerde: "Verê ke ez maya xo ra bî, maya mi û pîyê mi va ê  ke ma nameyê domana xo bikerê 'Kurdistan'. La waxto ke maya şina mudirê nifûse semedê qedexe nameyê Kurdistan qebûl nêkenê, mudirê nifûse keyeyê mi ra vanê nameyke bîn bifikrîyê keyeyî zî bê waştişê xo nameyê Zubeyde qebûl kenê. Ez qet fam nêkena çira nameyê Kurdistanî qedexe yo? Ez nika 23 serre ya ti kes mi bi nasnameyê Zubeyde nas nêkenê her kes mi bi nameyê Kurdistan nas keno."

	 

	'Her şar nameyê bi ziwanê xo danê domananê xo wa çira semedê kurdan qedexe yo?'

	 

	Zubeyde va ke reya ewil serra 2013an nameyê Kurdistan nasname de yeno qebulkerdiş û wina va: "Ez nameyê Kurdistan ra zaf hes kena. Keyeyê mi semedê hesret û kederê welatî nameyê Kurdistanî danê mi wa. Tena nameyê Kurdistanî nê, hîn nameyê kurdî nînê qebulkerdiş. Lazim o nameyê kurdî bêrê qebulkerdiş û no qerar fermî bo. Serra 2013an reya yewin Hîlvan de nameyê Kurdistan nasname de yeno qebulkerdiş, ma bo no zaf kelecan bî, la dewamê ci nêame. Her welatêke û her şarêke bi ziwanê xo nameyê domananê xo danê pa wa. La kurdan rê qedexe yo. Ma bi ti hawa azad nîyê."

	 

	Her çiqas nasname de Behîce bo zî heme aye Kurdistan nas kenê

	 

	Heto bîn ra dewa Deravaya Seyîdan de maya bi nameyê Behîce Dayan(60) ya zî Kurdistan eynî çî dir rî bi rî menda. Maya Behice semedo ke nasnameyê domana xo vejê şina mudirê nifûse. Wazena nameyê domana xo bikero Kurdistan la bi heqeretan dir rî bi rî manena û nameyê domana bêpers kenê Behîce. Her çiqas nameyê maya Behîce nasname de Behîce derbaz bibo zî dewijî bi nameyê Kurdistan aye nas kenê.