Sebahat: Tirkîya bîya welatê ke bi qirkerdişan yena vîr 

2017-12-28 14:44:27


	 

	AMED - Hemsereka Pêroyîya DBPî Sebahat Tuncele, bi munasebatê 6in ssergerra Qirkerdişê Roboskî mesaj eşrawit û wina va: "Welat de her qirkerdiş nîno roşnkerdiş, do xo dir qirkerdişê neweyan bîyaro."

	 

	Hemsereka Pêroyîya Partîya Mintiqayê Demokratîk (DBP) Sebahat Tuncele, Hepisxaneyê Hûmara 1 ê Kandirayî Kocaelî, bi rayîrê avûkatanê xo, ser nameyê heme şaredar û endamê partîyan bi munasebatê 6in sergerra Qirkerdişê Roboskî mesaj eşrawit. Sebahate dîyar kerde ke Tirkîya êdî bîya welatêke bi qirkerdişan yena vîrardiş û wina va: "Qirkerdişê Sîwasî heta Gumgumî, Gazî ra heta Roboskî yew înan ra nêame roşnkerdiş. Heta ke qirkerdişî nêrê roşnkerdiş, do xeberê qirkerdişê neweyan xo dir bîyarê."

	 

	Mesajê Sebahete hepisxane ra eşrawito winî yo: 

	 

	"6in sergerra Qirkerdişê Roboskî de, hema zî keyeyê Roboskî bendeyê edaletî yê. Bi munasebetê sergerra qirkerdişî ez serê nameyê heme hemşaredarê ma yê tewqîfkerdan û endamê partî qirkerdiş şermezar kena û kesê ke cuya xo vinî kerdê bi rêzdarî ana xo vîr. Ma sere de keyeyê Roboskî û heme pawitoxê heqê merdiman ê ke Roboskî xo vîr ra nêkerdî û nêdayî xovîrrakerdiş selam kena.

	 

	Tirkîya êdî bîya welatêke bi qirkerdişan yena vîr. Qirkerdişê Sîwas ra heta Gumgum, Gazî ra heta Roboskî înan ra yew nêame roşnkerdiş. Ne roşinkerdişê qirkerdişan û ne zî rastîyê qirkerdişan nêvînayî û no zî xeberê qirkerdişê neweyan do xo dir bîyaro. Qirkerdişê  Roboskî bi teyareyê şer ame kerdiş, selahîyetdarê dewlete qetî berpirsîyar bî, dosya amî padayîş. Padayîşê dosya do heqîqetî nêvurno. Rastî de teyareyê şerî yê no welatî, hemwelatîyê sivîl bombardûman kerdî û 34 ganî mîyanê ma ra girewtî. Heta ke hesabê no qirkerdişî nêro dayîş, mumkun nîyo ke destpêk newe ra bêro kerdiş.

	 

	No semed ra, reyna bi Qirkerdişê Roboskî dir, gerek heme qirkerdişê Tirkîya cigêrayîş bêrê kerdiş, hesab bêro perskerdiş û semedê heme pêşnayîşê birînan ‘Komîsyonê Edaletî, Heqîqet û Rî bi rî” bêrê awankerdiş. Heta kiştoxê qirkerdişî vejyê meydan û bêrê hukmkerdiş, ma do têkoşînê xo yê semedê Roboskî dewam bikerê û hesab pers bikerê.

	 

	Eke ma xo vîr ra bikerê, wa qelbê ma ziwa bibo."