Dûha Muhemed: Hêzê QSDyî bî çilaya ameyoxa ma 

2017-12-23 11:17:31


	 

	Rûken Goman

	 

	DÊRIK - Cinîya hemwelatîya Misirî Dûha Muhameda ke xeylê çîyan reyde rî bi rî menda qala hîkayeya xo ya destê çeteyanê DAIŞî de kerde û wina va: “Mi destê çeteyanê DAIŞî re xeylê çîyê zehmetinan ante, labelê ewro bi saya şevananê QSDyî reyna ez bi omid bîya û bi no hawa ewnîyena cuye”

	 

	Rojawan de xeylê kesî hetê çeteyan re ameyî qetilkerdiş, koçkerdiş, tecawizkerdiş, rotiş û sewbîna xeylê çîyî. Çeteyê DAIŞî cinî û domanan bazaran de rotî. Cinî û doman hetê çeteyan re ameyî îstîsmarkerdiş û sey haletê zayendî ameyî xebitnayiş. Înan re yew zî hemwelatîya Misirî Dûha Muhemeda 35 serre û dayika 4 domanan a. Dûha qala hîkayeya xo ya rizgarbîyayişî destê çeteyanê DAIŞî kerde û dîyar kerde ke xeylê reyan tecawizî reyde rî bi rî menda û ameya rotiş.

	 

	Dûha destpêkê qiseykerdişê xo de wina va: “Ez sere de Misir de bî ya. Mêrdeyê mi netîceyê teqayişê bombeyî de merd. Hîkayeya mi badê mergê mêrdeyê mi dest pêkerde. Misir de heqê cinîyan zêde yeno çin kerdiş. Cok ra mi ewja de xeylê zehmetîyan ante. Badê ke ez tena menda, ez mecburî xebitîyaya. Wexto ke mi qerarê xebatî da, ez raştê tecawizî ameya. Seba ke ez hesab bipersa mi muracatê mehkema kerde. Labelê derheqê tecawizkarî de doze nêame akerdiş û sey hedîseyêko normal ame dîyîş.”

	 

	'Avûkat Ebû Hemze mi xapêna û teslîm kerd'

	 

	Dûha dewamê qiseykerdişê xo de dîyar kerde ke hetê avûkat Ebû Hemzeyî re ameya xapênayiş û wina domnaye: “Avûkat Ebû Hemzeyî mehkema de piştî da mi, labelê tewr peyên mi xapêna û mi re va ‘Ez do to biba cayeko tede edalet û cuyêka weş tede esto.’ Mi qet texmîn nêkerde ke do mi bîyaro Sûrîya. Ez zanayêne ke rewşa Sûrîye senîn a. Sere de ma ameyî Tirkîya û Dîlokî re ma ameyî Reqqa. Mi qiseykerdişan re fehm nêkerdêne. Çeteyê DAIŞî seba ke ez vengê xo nêkera hertim mi kutêne. Cok ra ez mecbur menda kes ey înan bikera. Cuya mi ya ewja sey cehenim bî. Badê serrîyek mi qerarê têkoşînî da û mi qerar da ke ez birema. No qerar zehmetbî, kesê ke teşebbusê remayişî kerdêne hetê çeteyan re ameyêne qetilkerdiş.” 

	 

	'Ez xoverdayişê şervanê cinîyan re tesîr bîya'

	 

	Dûha tewr peyên wina va: “Wexto ke şervanê QSDyî vilawekan teyare ra eştî war, mi qerar da ke ez xo biresna şervananê dewa Ebû Xeşebî. Mi domananê xo girewt û ma remayî. Bi no hawa ez tarîtî ra rizgar bîya. Ez wazena ke Rojawan de bicuya. Tîya de heqê cinîyan esto û heqê cinîyan yeno pawitiş. Ez xoverdayişê şervanê cinîyan re tesîr bîya. Ez seba domananê xo cuyêka azad û asan wazena.”