Goreyê TCKî ensest suc nîyo

2017-12-18 11:18:45


	 

	 

	Duygu Erol 

	 

	ENQERE- Goreyê cigêrayîşê ke ameyê kerdiş, her 10 kesan ra 4 kesî Tirkiye de mexdurêensestî yê û semedo ke vernîye ensestî bêro girewtiş cezayêke çin a. 

	 

	Federasyonê Komeleya Cinîyan ê Tirkîya (TKDF), 2014an de bi ‘Projeyê Atlasê Ensestî yê Tirkîya’ 56 bajarî de derheqê ensestî de cigêrayîş kerdê û wexto ke cigêrayîş dewam kerdêne, sîteya înan amî hack kerdiş û no semed ra nêeşkayî netîceyê cigêrayîşî eşkera bikerê. Dima ra îzahatêke dayî û dîyar kerdî ke goreyê dayîyan Tirkîya de ensest se ra 40 o û va her 10 kesan ra 4 xo mexdurê ensestî yê. Tirkîya ke xeberê derheqê raporî de zî kerdî sebebê lînçî, hîrê serre derbazbîyaye de tablo nêvurya. Rojnameger Melîs Alphana ke hedîse arde rojev rastê lînçî amî. Sereka TKDFî Canan Gullu derheqê babete de şîrove kerde. 

	 

	Canane dîyar kerde ke ensest her tewir şîdet û tevgerê sîstematîk yê fîzîkî û nê fîzîkî yê hemverê ciwan û domanan ê semedê hişyarkerdişê zayendî ameyo kerdişî yo û va komê emrê ke cigêrayîş kerdê zî, domanê ke binê emrê 18 de yê. 

	 

	'Ganî xebatê hişyarkerdişî bêrê kerdiş' 

	 

	Canane da zanayîş ke derheqê ensestî de xebatê zaf ê zanayîşdayîş û hişyarîkerdiş nînê kerdiş û qiseykerdişê xo wina dewam kerde: "Ganî mamosteyê ke kesê vernî hedîse fam kenê bêrê wezîfedarkerdiş, reyna hekîmê keyeyan rê zanayîş bêro dayîş, gerek xetê telefonî domanî bieşkê bixebitnê û îstîmar neql bikerê. Bajaran û panodan de bêrê mojnayîş. Gerek verdibistan ra bigî heta merheleyê bîn ê mufredatê pewerdeyî de xebatê hişyarkerdişî bêrê kerdiş. Nê çîyê ke mi vatê ganî dewlete bikero. Eynî wextî de ganî Sazgehê Komeleyê sivîlan, îdarekerdoxê mintiqa zî na xebate bikerê. Gerek merkezê rehabîlîtasyonî bêrê akerdiş." 

	 

	Canane peynîya qalîkerdişê xo de da zanayîş ke mexdurê ensestî reya diyîn hetê çapemenî ra yenê mexdurkerdiş.