Wezîrîya Cizîrî reyna înkar kerde 

2017-12-15 12:34:45


	 

	ŞIRNEX - Keyeyê hemwelatîyêk ke qedexeyê tebervejîyayişî yê Cizîrî de cuya xo vînî kerdbî, seba tazmînato madî û manewî muracatê mehkema kerd. Wezîrîya Karê Teberî zî bi nuşteyêk talebê keyeyî red kerde û Serekîya Mehkemeya Îdarî ya 1. ya Mêrdînî re erşawit

	 

	Qezaya Cizîrî ya Şirnexî de mabênê 14ê kanûna 2015î û 2ê adara 2016î de qedexeyê tebervejîyayîşî amebî îlankerdiş. Herçiqas ke qedexe ser ra 2 serrî derbaz bîyî zî cenazeye xeylê kesan hema nêameyî dîyayîş û biseyan kesî hetê hêzê dewlete ra ameybî qetilkerdiş. Mîyanê înan de doman, cinî, pîr û kalî zî estbî û bi çekan ameyî qetilkerdiş. Derheqê înan de heta nika xeylê mehkemaye abîyî, labelê heme zî bênetîce mendî. 33 dosya bi mehneya pawitişê meşru yê polîs û leşkeran ameyî padayiş. 

	 

	Keyeyê hemwelatîyêk ke qedexeyê tebervejîyayişî yê Cizîrî de cuya xo vînî kerdbî, seba tazmînatê madî û manewî muracatê mehkema kerd. Keyeyo ke muracat kerd bi piştîdayişê avûkatanê xo muracatê Serekîya Mehkemeya Îdarî ya 1. ya Mêrdînî kerdî û dima ra waştî doza tazmînate biakerî. Wezîrîya Karê Teber nuşteyêk erşawit mehkema re û nuşte de reyna vejîya raşte ke dewlete wazena ke hedîse ser bigîra û sey ke wextê qedexeyê tebervejîyayişî de virazîyayo bido binawnî. Wezîrîye nuşteyê xo de ca nêda sivîlê ke bi beyraqa sipe vejîyabî teber û îdîa kerde ke xebatkarê weşî taxe de amade bî.

	 

	Mehneya ‘tazmînat haletê dewlemendî nîyo’

	 

	Nuşteyê Wezîrîya Karê Teber de yeno vatiş ke qeza de tedbîr û pawitişî asta tewr berz de bîyî û derheqê hedîse de ti delîl çin î, çinbîyayişê delalîlan ver muracat ameyo redkerdiş. Wezaret yew bi yewe cewab daya nuqtaya qusurê xizmetî ke muracatê keyeyî de ameybî nuştiş re. Pereyo ke tazmînat de ameybî talebkerdiş zî bi mehneya ‘tazmînat haletê dewlemendî nîyo’ ameyo redkerdiş.

	 

	Labelê endamê BTOyî

	 

	Heto bîn de wezîrî nuşteyê xo de îdîa kerde ke kesê ke gule reşênayî dîyar nîyî, labelê endamê BTOyî. Wezîrî nuşteyê xo de îdîa kena ke 43 hezar û 860 kesî bi hawayo ewle herême re ameyî tehlîyekerdiş û qeza de ambulansî ameyêne vindetiş.