Hîkayeya Gule: Eke şima biwazê kes nêeşkeno şima bido vindarnayîş

2017-12-14 12:03:30


	 

	Medîne Mamedoglu

	 

	MÊRDÎN - Gulê Bîlge dimayê ke camêrdê aye yeno tepiştiş, semedê 6 domananê xo ra biewno, ocaxa çay de çay û qehwe roşena û pê debara xo kena. Gulê Bîlge wina va: “Wexto ke ez newe ameya tîya mi her wext persê ‘Ez do senîn nê karî bikerî' mi xo ra pers kerdêne. Wexto ke mi dî ez eşkena no karî bikerî mi va ‘Kes nêeşkeno mi ti babete de bido vindarnayîş.' Ez nika dewam kena." 

	 

	Gulê Bîlgeya ke Mêrdîn de cuyena çend aşmî verê mêrdeyê ci ame tepiştiş û tewqîfkerdiş. Gule ocaxa çaye mêrdeyê xo dana xebitnayîş û pê debara xo kena. Gule dîyar kerde ke dimayê ke mêrdeyê aye ameyo tepiştiş, semedo ke domananê xo ra biewnîyo dest bi xebate kerda û qiseykerdişê xo wina dewam kerde: “Tîya dikanê mêrdeyê mi bi. 6 domanê mi estê. Semedo ke ez biewnî înan ra no karî kena. Pasaj de xêrcê mi ti cinî nêxebitêna. Bi amancê ez bimojnî cinîyan ke cinî eşkenê se bikerê tîya xebityena. Ez tîya çay û kahwe debara xo kena." 

	 

	'Mi zehmetî ant la mi xo ver da'

	 

	Gule dîyar kerde ke vernê de zaf zehmetî anto la ser ê linganê xo de menda û wina va: “Hîn muşteriyê camêrdî heta verê bera ameyî û şîyê. Verê mêrdeyê mi bêro tepiştiş, polîsan her wext eştêne ser dikanî. Dima ra zî semedo ke ez hewceyê kesî nêbî mi dest bi nê karî kerd. Tîya yewin cinîya ke xebityena ez a. Ez bi no serberz a."

	 

	Gule ard ziwan ke kes nêeşkeno aye bido vindartiş û ganî cinî piştdayîş bidê yewbînan.