Domanê ke taxa kale de xebityenê: Vera xebate mi waştêne ez mektebe de bîyene 

2017-12-11 14:18:54


	 

	Habîbe Eren

	 

	ENQERE - Domanê ke taxa Kaleyê Enqere de cuyenê, semedo ke xebityenê nêeşkenê biwanê. Domanê ke emrê înan mabêne 8 û 13 de vuryenê, beşêke derg ê wextê xo Kale de bi xebate derbaz kenê. Domanê ke benê şahidê tîryakî zî, xeyalê înan en pîl o yo ke 'semedo ke kesê xiraban bigîrê, bibê Supermen.'

	 

	Domanê taxa Kaleyê Enqere de keyeyê wêranan de cuyenê, vera ke şêrê mektebe mecbur manenê bixebitîyê. Domanê ke hewaya serdin de xebityenê, hemverê sîstemî bêpawitox ê.

	 

	Azad Demîrkirano 13 serre ke Kale de cuyenê, çar serrî yo Kale de darbuqe dano piro û 7 wayê û birayê. Dimayê ke pîyê xo vinî keno, dest bi xebate keno û maya ey zî xebityena.

	 

	'Mi waştêne ez mektebe de bîne'

	 

	Azado ke ganî bîşîne sinife 7ine la hîrê serrî yo semedê xebate nêşino mektebe û dîyar kerd ke o wazeno perwerdeyê muzîkî bigîro û va vera mektebe yeno xebityeno.

	 

	Azad dîyar kerd ke roje de 20-30 lîra qezenc keno û va: "Mi waştêne şert û mercê mi baş bîne. Kale de heme domanî winî yê. Ma heme kuçeyan de xebityenê. Xeyalê mi en pîl doktorî bi. Ez wazena hetkarî bîdî nêweşan."

	 

	Alî Turano 12 serre taxa Kale de mektebe waneno û hîrê wayê û hîrê birayê. Pîyê ey taxe de darbuqe dano piro. Alî dîyar kerd ke o vera xebate wazeno şêro mektebe û va xeyalê ey en pîl bibo Supermen û xeraban bitepşino.

	 

	Umut Demîrkirano 11 serre şino sinife 5ine û va o zî wazeno bibo zanist. Berkan Turano 15 serre zî dîyar kerd ke o wazeno şêro konservatuar û bibo muzîsyen.