Cinîyek û di ciwanî destê çeteyanê DAIŞî ra ameyî filitnayiş 

2017-12-04 14:06:58


	 

	Ehlam Hecî /Viyan Hisên 

	 

	ŞENGAL - 3ê tebaxa 2014î de cinî, dayik, doman û ciwanê êzidî hetê çeteyanê DAIŞî ra ameyî teslîmgirewtiş û îşkenceyê wehşane bi înan ameyî kerdiş. Hemleya Firtineyê Cizîrî de hetê hêzê HSDyî de cinîyek û 2 ciwanê êzidî destê çeteyanê DAIŞî ra ameyî filitnayiş û teslîmê keyeyanê înan ameyî kerdiş.

	 

	3ê tebaxa 2014î de çeteyê DAIŞî kewtî bajarê Şengalî û bi hezaran cinîyê êzidîyan bihawayo wehşane teslîm girewtî. Cinîyê ke ameyî teslîmgirewtiş bazaran de ameyî rotiş û sey kole ameyî xebitnayiş. Labelê destpêkerdişê Hemleya Firtineyê Cizîrî de xeylê cinî û doman destê çeteyan ra ameyî filitnayiş. Hemleya Firtineyê Cizîrî de tewr peynî cinîyek û 2 ciwanî hetê şervanan ra ameyî filitnayiş. Nameyê kesê ke ameyî filitnayiş wina yî; Kerîma Berkat, Azad Elî û Wisam Salihî yî.

	 

	Ganî ma rêxistinê xo bi hêztir bikerî

	 

	Îdarekara Meclisê Xanesorî Qasim Xelefe derheqê babete de dîyar kerde ke vera hêrişanê çeteyanê DAIŞî de ma piştîyê xo nêtewnenê û ganî ma rêxistinê xo bi hêztir bikerî.

	 

	Heto bîn de zî dayika Wîsam Saliho ke destê çeteyan ra ameybî filitnayiş Emîne Salihe qisey kerde û qiseykerdişê xo de wina va: “Ez filitîyayişê lajê xo ver zaf kêfweş a. Labelê hema mêrde û 2 domanê mi destê çeteyanê DAIŞî de yî. Destê şervananê azadîye weş bo. Heta kem a weş bibî, ma hewlê şervananê HSDyî vîra nêkenê. 

	 

	Ma spasîyê xo şervananê azadîye re kenê

	 

	Sewbîna zî birayê Kerîma Berekete, Xêro Bereketî qisey kerd û wina va: “Ma spasîyê xo şervananê azadîye re kenê ke ewro waya mi rizgar kerdî. Ma bawer kenê ke do dayik, ciwan û cinîyê ke hema destê çeteyan de yî zî do çeteyanê DAIŞî ra bêrî filitnayiş.”