Feleknase: Dewlete nêeşka gamêk tepîya bida eştiş 

2017-12-02 12:23:20


	 

	Şehrîban Aslan

	 

	AMED - Herçiqas ke xoverdayişê qezaya Sûrî ya Amedî ser ra serrîyek bivîyara zî heme çî hema sey ewro vîrê merdiman de yo. Parlementera HDPyî ya Amedî Feleknas Ucaye derheqê xoverdayişê 103 rojan de qisey kerde û dîyar kerde ke dewlete nêeşka bi kurdan gamêk tepîya bida eştiş

	 

	Sey ke yeno zanayiş xeylê bajar û qezayanê Kurdistanî de xoverdayiş dîyabî dest pêkerdiş û netîceyê îlankerdişê xoserîya demokratîke de hêzê dewlete kewtî qeza û bajaranê Kurdistanî. Qezaya Sûrî ya Amedî ke 2ê Kanûna 2015î de qedexeyê tebervejîyayîşî ameybî îlankerdiş. Netîceyê qedexeyê tebervejîyayişî de xoverdayiş dîyabî dest pêkerdiş û xoverdayişê taxe 103 rojan dewam kerdbî. Şarê qezaya Sûrî bi aşman xover dabî.

	 

	Babete ser o  Parlementera Partîya Demokrasîye ya Şaran (HDP) Feleknas Ucaye qisey kerde û qiseykerdişê xo de da zanayiş ke fermanê şer û qetlîamî Anqara ra dîya.

	 

	Amed şahidîya şerê pîlî kerd

	 

	Feleknase qiseykerdişê xo de bale ante xoverdayişê 103 rojan ser û wina va: “Qezaya Sûrî ya Amedî de xoverdayişêko pîl ame cuyayiş û ciwanê kurdî vera artêşo tewr pîl yê NATOyî de têkoşîn dayî meşnayiş. Artêş, leşker û hêzê taybet bi çek û bombeyan waştî ke bikewî Sûrî. Qezaya Sûrî de bi aşman şer ame cuyayiş. Şarê Amedî şerêko pîl rê şahidî kerd. No şer de xoverdayişê ciwanan estbî û heto bîn de zî qirkerdiş estbî.”

	 

	Konseptê çinkerdişî pê ardî

	 

	Feleknase dewamê qiseykerdişê xo de va ‘tena qezaya Sûrî de nê teberê Sûrî de zî xoverdayişî estbî’ û wina domnaye: “Seba ke doçpêç bêro şiknayiş, şarê Amedî weriş payan ser. Hezaran kesî bajar, qeza û taxan de xover dayî, raştê hêrişan ameyî, labelê reyna zî xoverdayişî ra fek veranêdayî û taxan nêteriknayî. Çalakîya taxan de bi desan ciwanî ameyî qetilkerdiş. KCD, DBP û HDPyî seba vindetişê hêrişan muracatê îdarekarê dewlete, walî û qeymeqamî kerdî û pêvînayişan pê ardî. Labelê wexto ke ma wina kerd, bi ma ser de zî hêrişî virazîyayî. Seba ke Sûrî konseptêko plankerde ame îlankerdiş.”

	 

	Reyna zî xoverdayiş nêame şiknayiş

	 

	Feleknase qiseykerdişê xo wina qedênaye: “Amerîka serra 1990î de tanqan rot Tirkîya. Tirkîya zî nê tanqan erşawit qezaya Sûrî û çimanê heme kesan ver de qirkerdiş û rijnayiş pê arde. Xeylê kesî taxan de ameyî qetilkerdiş û cenazeya înan bi rojan kuçeyan de mende. Cenazeyê ke 26 rojî erd ser de mendî estî. Hende herişan ra dima reyna zî xoverdayiş nêame şiknayiş û ciwanî xover dayî. Baş yeno zanayiş ke fermanê şer û qetlîamî Anqara ra ame dîyayiş.”