Komiro bêpere zirar dano hewa û weşîya şarî ro 

2017-12-01 12:27:58


	 

	WAN - Komiro bêpere ke şarî rê yeno vilakerdiş, hetêk ra hewa lişîn keno, hetêk ra zî weşîya merdiman kono xetere.

	 

	Mintiqaya Serhedî de bi ameyîşê zimistanî dir vurnayîşê vewre, bandurêke negatîf cuyayîşê şarî ser kerd û hemwelatî semedê germbîyayîşî soba komirî xebitnenê. Komiro ke beno sebebê lişînîya hewa, rayîr ver bi jehrbîyayîşî zî akeno. Wan de soba ameyê ronayîş û komir yeno xebitnayîş. Rojê verê de qezaya Tuşba de keyeyêke ra 2 ci ra doman 8 kesî gazê karbonmonoksîtê komirî ra jehrî bî û wedarnayî nêweşxane. Komiro ke dewlete bê pere vila kena, mehdî vila kena û asayîşê ganê şarî kena xetere.

	 

	Dumanê komirî nêweşîyan vila keno

	 

	Wan de hema hema her keye de saetê rew yê siba de soba fînenê ta û heta ereyê şanî zî dewam keno. Dumano jehrî yê ser ê bajarî de virazyeno zî bale merdiman anceno. Dumano ke hewa de vila beno, rayîrê nêweşîyan akeno. Hemwelatîyê semedê halê ekonomî komiro ke dewlete dana xebitnenê, dîyar kenê ke komir binê kontrolî de nînê derbazkerdiş û rayîr vernîye jehrbîyayîşî akeno.

	 

	Hemwelatîyan ardî ziwan ke semedê boya giran ê komirî, nêeşkenê pacanê xo akerê û wazenê ke çareserîyêke bêro vînayîş.

	 

	Selahîyetdarî bêveng ê

	 

	Her serre sebebê komirî ra bi seyan kesî jehrî benê û xeylê kes zî cuya xo vinî kenê. Hetêk bîn ra zî hewa bena lişîn. Her çiqasa ekolojîstî hemverê xebitnayîşê komirî bê zî, Tirkîya de cayê komirî de bi sehezaran karker xebityenê. En peynî Şirnex de aşma teşrîna verêne de 7 karkerî cuya xo vinî kerdibî.

	 

	Selahîyetdarî hemverê hedîseyê ke yenê cuyayîş, bê veng manenê û komirê jehrî şarî rê vila kenê.