Grevê vêşanî de roja 28ine: Hepsîyan ra zanayîş nîno girewtiş 

2017-11-28 12:05:41


	 

	DÊRSÎM - Hepisxaneyê Tîpê T yê Xerpêtî de hepsîyê ke kewtibî grevê vêşanî de roja 28ine de yê. Derheqê halê weşîya hepsîyan de ti zanayîş nêame girewtiş û yeno vatiş ke hepsîya bi nameyê Fethîye Ok 15ê Teşrîna peyêne ra hucre de yena tepiştiş.

	 

	Grevê vêşanî yê hepisxaneyê Tîpa T yê Xarpêtî ke hepsîyan dabi destpêkerdiş, kewt roja 28ine. Koxuşê C-4  de grev dewam keno û hepsîyê koxuşê D-6 de zî çar rojan ra reyke bi hawayo açarnayene grev dewam kenê. Semedo ke hepsîyan ferzkerdişê nasnameyan qebûl nêkerd, nêvejênê pêvînayîş û muracatê keyeyan ê dozgerîyê hepisxaneyî netîce nêda.

	 

	Fethîye 15 Teşrîna Peyêne ra heta nika hucre de ya

	 

	Hepsî semedê caardişê sey ferzkerdişê potê yew rengî, eştişê koxuşan û ferzkerdişê nasnameyê 1ê Teşrîna Peyêne ra grev de yê. Hepsî nêeşkenê bi avûkatanê xo dir pêvînayîş bikerê. Cinîyê ke rastê şîdetê psîkolojîk û fîzîkî ameybî, bi mesajê cîya bi cîya dabî zanayîş ke do xoverdayîşê xo dewam bikerê. Hepsîyan ra Fethîye Oke 15ê teşrîna peyêne ra hucre de yena tepiştiş. Ame zanayîş ke koxuşê D-6 de hepsîya bi nameyê  Dersîm Konak, Gamze Daş, Elîf Çelîk, Çîgdem Kiliç, Gîzem Yamaç çalakîya xo yê grevî dewam kenê.

	 

	Baro do rojê ameyox de bêrê têhet 

	 

	Merdimê hepsîyan da zanayîş ke domanê înan caardişê merdimayî wazenê û dayî zanayîş ke do her halî de piştdayîş bidê domananê xo. Komîsyonê Hepisxaneyê Baroyê Amedî avûkat Oyku Çakmak zî va do rojê ameyox de Baro derheqê prosesî de bêrê têhet.

	 

	Yeno pawitiş ke endamê Komîsyonê Cigêrayîşê Heqê Merdiman ê  TBMMî waştişname do bido îdarekarê hepisxaneyî.