'Jinwar do cuya xozayî awan bikera' 

2017-11-25 12:47:36


	 

	Civîn Hûsen

	 

	DIRBÊSIYÊ - Komeleyê û Heyetê cinîyan seba piştîdayişî şîyî dewa Jinware. Komeleyê bajarê Dirbêsî ra Qantonê Qamişlo yê Herêma Cizîrî yê Meclisê Êdaletê Cinîyan,Keyeyê Cinîyan ya Qamişlo, Heyetê Silhê û Heyetê Cinîyan şîyî dewe. Cinîyê ke şîyî dewa Jinware îzehet dayî û dîyar kerdî ke do dewa Jinware biba sitargehê heme cinîyan.

	 

	Babete ser o cinîyan ra Endama Meclisê Edaletî Ebla Xelîle, Îdarekara Keyeyê Cinîyan ya Qankonê Cizîrî Ilham Omere û Endama Heyetî Silhê Nafiya Hesene qisey kerdî.

	 

	Cinîyan ra Ebla destpêkê qiseykerdişê xo de bale ante keda cinîyan ser û wina va: “Dewa Jinware heme cinîyan zilm, şîdet û îşkenceyî ra pawena. Keda ke awankerdişê dewe de yena dayiş pîroz û bimbarek a. Dewa Jinware bi ked ê hêvîya cinîyan awan bena û na keda pîroze do vernîya şîdet û neheqîyan bigîra. Jinware do biba omidê heme cinîyan. Sembolê edaletî cinîya azade ya. Ma do bi wijdanê cinîyan edalet awan bikerî. Cinî bi felsefeya Rayber Apoyî edalet awan kenê.”

	 

	Projeyê Rayber Apo yo

	 

	Ilhame destpêkê qiseykerdişê xo de kêfweşîya xo arde ziwan ser û wina dewame kerde: “Ez awanbîyayişê dewa Jinware ya heme cinîyan pîroz kena. No proje projeyê Rayberê Şarê Kurd yê Abdullah Ocalanî yo. No proje seba heme cinîyan ameyo viraştiş. Jinware do xozaya cinîyan bipawa.”

	 

	Ganî dewe bêra pawitiş

	 

	Cinîyan ra tewr peynî Nafiya qisey kerde û aye zî qiseykerdişê xo de wina va: “Dewa Jinware do dej û kulê heme cinîyan rê biba derman. Ma xeylê kêfweşî ke bi sedan cinî awanbîyayişê dewe de ca gênê û piştî danê dewe. Jinware sitargehê heme cinîyan a. Ganî heme cinîyî wayîrê na sitargehe bivejî.”

	 

	Cinîyê ke şîyî dewe qiseykerdişan ra dima şêranî vila kerdî û bi hawayo kêfweşî govend gêrnayî.