Rayîrê koçberî de baxçeyê fêkîyan 

2017-11-15 12:53:01


	 

	Fîlîz Zeyrek

	 

	EDENE - Tayê xo Wan, tayê xo Kobanî ra koçî Edene kerdî û baxçeyê fêkîyan de xebityenê. Yewin xeyalê karkerê ramitişî yê cinî zî o yo ke heqê keda xo bigîrê.

	 

	Karkerê ramitişê baxçeyê narencîyê Dogankentî yê Yuregîrê Edene de xebityenê, dîyar kenê ke keda înan yena mêtîngerkerdiş û vatî dewlete meaşê karkeran zêde nêkena la zamê awe, ceyran û gazî zêde kena. Cinîyan va asayîşê înan ê weşî çin o û ganî problemê karkerê cinîyan bêrê çareserkerdiş.

	 

	Bedeno qij, baro giran...

	 

	Zeynep Coşkune ard ziwan ke heqê keda xo nêgînê û wina va: "Zelzeleyê Wanî de keyeyê ma rijya û ma ameyî tîya. Ez 10 serrî bîya la ez mecbur bîya bixebitîyî. Ez nika 17 serrî ya. 7 serrî yo ez nê karî kena. Mi rojê xo yê en zehmet ê cuyayîşî tîya cuya ya."

	 

	Zeyneba ke barê giran ê bedenê aye qijî bar bîyo, wina vana: "Ma karkerê ramitişî bê şik kedêke pîl danê. La en zaf ê ke yenê mêtîngerkerdiş ma yê. Kes ma nêvîneno, ne zî vengê ma eşnaweno. Bi taybetî keda ma cinîyan zêde yena werdiş. Ma karê xeter kenê. Ez şina serê dare. Çîyêk bêro sereyê mi kam do hesab bido. Xeyalê mi en pîl wendiş o. Ez wazena bibî mîmar. La semedê astengîyan mi nêwend."

	 

	'Ma nêeşkenê paşte xo rast bikerê'

	 

	Behiye Çolake zî semedê polîtîkayê şer yê dewlete  Wan ra koçê Edene kerdo û da zanayîş ke ê serê herre xo de huzûrîn bîyê û wina va: "Bi 10 serrî ma xebityenê. Çawîş serê ma de vindenê. Ma nêeşkenê sereyê xo berz bikerê. Semedo ke domananê xo bidî wendiş, her şert û mercî de xebityena. Her siba ma saete 03.00 de wirzenê û heta 18.00 ma xebityenê. Roja ma zî 50 TL yo. Ma nêeşkenê pakêtêke makarna bigîrê. Her roje zam yeno serê kîra, awe û ceyranî. Ma wazenê heqê ma bikoyê binê asayîşê qanûnî."

	 

	Rojawanî ra verbi baxçeyê mandalîna...

	  

	Halîde Cemal zî dimayê hêrişê DAÎŞî, Rojawan ra koçê Tirkîya kerde. Hîrê domanê Halîde estê û da zanayîş ke Tirkîya welatêke xeylê zehmet o, vayo û heqê keda xo nêgînê. Halîde ard ziwan ke yewin xeyalê aye o yo ke ageyro herre xo ser.

	 

	Dîlber Muskoya 18 serrî zî Kobanê ra koçî Edene kerdo û bi xeyalê welatê xo baxçeyê fêkîyan de xebityena. Dîlbere peynîye qalîkerdişê xo ard ziwan ke zaf acis benê û wina va: "Herre her kesî ro her kesî rê pîroz a. Ma tîya sey kolan xebityênê. Tîya heme kurdê koçkerberî estê. Ma tîya piştdayîş danê yewbînan. La reyna zî ma wazenê ageyrê serê herre xo."