Fêkîyê tewir bi tewir bi keda cinîyan deresayenê 

2017-11-10 13:20:59


	 

	Medîne Mamedoglu

	 

	MÊRDÎN - Herre dewlemenda Omeryanî bi berardişê cinîyan xemilyen. Nure Aktuga ke baxçeyê xo de fêkiyê tewir bi tewir deresayenena, dîyar kerde ke aye heqê kede xo nêwazena.

	 

	Omeriyano ke bi ko û weşîkîyê xo yeno nasnayîş, dewa  Talatî de cinî heme warê cuyayîşî de bi hawayoke aktîf xebityenê û berardiş kenê. Têkilîyê ke cinî bi xoza dir danê ro, wextê tebîî anê vîrê merdiman. Cinîyê ke baxçeyê xo de heme waran de xebityenê bi berardişê ke kenê debara xo zî kenê.

	 

	'Ê zî ewnîyenê mi ra'

	 

	Nure Aktuge hetêk ra fêkî kom kena û hetêk ra zî keda ke dana baxçe qalî kena û wina va: "No baxçe verê ra esto. Ez her roje yena û awe dana. Ti darêke mi nê ramêtê çin ê. Ê zî sey domanê mi pîl benê. Nê darê mi heta bî pîl mi zaf zehmetî ant û nika zî ê ewnîyenê mi ra. No baxçe de fêkîyê tewir tewir estê. Wexto tewirêke derbaz beno wexto bîn yeno. No zî mi kêfweş keno."

	 

	'Cinî kedêke pîl danê'

	 

	 Nure dîyar kerde ke ê zaf rincan benê û nê çî vatî: "Ma tena darê fêkîyan ra nêewnîyenê, ma berardişê sebze zî kenê. Ma her serê siba rew wirzenê û dest bi xebatan kenê. Na dewe de heme karê ke yenê kerdiş de keda cinîyan esta. No baxçe û rezê na dewe heme bi kede cinîyan ameyê na merhele."

	 

	'Heqê keda ma nêdanê ma'

	 

	Nure vana ke têkilîyêke zaf xurt mabêne aye û xoza de esta la heqê keda ma nêdanê ma. Nure qalîkerdişê xo winî qedêna: "Heqê keda ma nîno dayîş. Nîmeyê kede ma şino komîsyonî rê. Reyan sebze û fêkiyê ke ma wazenê berê qeza de biroşê, heqê benzînê wesayîtî zî nêvejeno. Kede ma yena pelçiqnayîş, la reyna zî ma hewl danê ke debara xo bikerê."