'Awe çin a cereyan çin o la ez bi hêvî ya' 

2017-11-09 17:16:32


	 

	Medîne Mamedoglu

	 

	AMED - Meryem Ozgezera ke hemverê rijnayîşê Sûrî keyeyê xo terk nêkerd xo 'Mîyanê xirebeyan de sey cinîya bi tena' dana naskerdiş. Meryeme va: "Tenaverdayîş çarenuştişê Sûrî nîyo" û vana ke dimayê çend serdayîşî Sûr reyna ameyo xovîrrakerdiş. Meryeme hemverê nê nêbîyayîşan wina vana: "Ne awe esta ne zî ceyran la ez bi hêvî ya."

	 

	Rijnayîşo ke Taxê Alîpaşa û Lalebeyê Sûrî de binê nameyê 'vurnayîşê bajêrî' de 24ê gulane de ame destpêkerdiş dewam keno. Bi rijnayîşê ke yeno kerdiş de taxa Lalebeya ke ameya rijnayîş, înşakerdişê otelê ke tarîxê Sûrî çin kenê roj bi roje zêde benê. Meryem Ozgezere ke sey Eme niştecîyê Sûrî yena naskerdiş, bi aşman o kuçeyê ke rijnayîş tede esto xoverdayîşê xo dewam kena. Eme Meryeme hemverê bê awe û bê cereyanî bi 3 domanê xo dir kuçeyê ke rijnayîş tede yeno kerdiş xo ver dana.

	 

	'Bi 2 aşmîyo ez keyeyê xo Sûrî de xo ver dana'

	 

	Meryeme bi hacetê mekteban ke dikanê xo yê qij de roşena, debara xo kena. Meryeme dîyar kerde ke semeod ke mektebî zî ameyî rijnayîş, êdî nêeşkan rotiş zî bikero û hetê ekonomî de zî probleman cuyena. Meryema ke va şarê Sûrî hem hetê manewî û hem zî hetê ekonomî de probleman cuyenê wina qalî kerde: "Heme çîyê ma destê ma ra girewtî la do nêeşkê hêvîya ma bibirnê. Ma hemverê vindertişê îqtîdaran sey darêke çame serê lingan de yê û xo ver danê. Ma warê xo nêtereknenê. Bi 7-8 aşmîyo na taxe de rijnayîş yeno kerdiş, la bi di aşmîyo ez no kuçe de xo ver dana û fek xoverdayîşî ra vera nêdana."

	 

	'No çarenuştişê Sûrî nîyo'

	 

	Meryeme her roje bi tedayê polîsan dir rî bi rî manena û vana ke cayêke şêro çin o. Meryeme peynîye qalîkerdişê xo de wina vana: "Cayêke ez tede şîrî çin o. Eke ez tîya ra vejîyê, ez do bêhêvî bimanî. Ez cayêke bîn de zî  nêeşkena bicuyî. Ez dest keyeyê xo ra vera nêdana. Terkkerdiş çarenuştişê Sûrî nîyo."