Sûrî açarnenê warê rantî, şar yeno mexdurkerdiş 

2017-11-02 12:10:17


	AMED - Taxa Alîpaşa yê Sûrî binê nameyê vurnayîşî bajarwanî de sera 80 ame rijnayîş û cayê ke keyeyî ameyî rijnayîş do otelê butîk û kargeyî ca bigîrê. Yeno vatiş ke do xebata înşaatî 400 rojî de biqedîyo.

	 

	Rijnayîşê taxa Alîpaşa yê Sûrê Amedî dewam keno. Rijnayîş sera 80ê temam bi û hemwelatîyê ke keyeyê înan destê înan ra ameyo girewtiş, şert û mercê giranan de cuyenê. Cayê keyeyê hemwelatîyan zî do otelê butîk û kargeyî ca bigîrî.

	 

	'Verê ke netîceyê huqûqî bibê otelî yenê viraştiş'

	 

	Hemwelatîyê taxe de cuyenê û bi zor keyeyê xo ra ameyî vetiş, dîyar kerdî ke vera keyeyê înan TOKÎ yenê viraştiş. Hemwelatî ke wina va: "Vera keyeyê mi do otel viraznê. Ez bi zor keyeyê xo ra ameya vetiş. Mi muracatê rayîrê huqûqî dabi. Hema netîce nêbîyo la înşaatê otele tay mendo biqedîyo."

	 

	Verfeka Platformê Piştdayîşê Sûrî dir Buşra Cîzrelîoglu xebata otele ê taxa Alîpaşa şîrove kerde û da zanayîş ke îhale hetê Fîrmayê LEDA Yapimî ra ameya girewtiş û nika do 3 otelê butîk û 57 awanî û 8 dikanî bêrê viraştiş. Yeno vatiş ke do  400 rojî de otel û dikan bêrê temamkerdiş.