Çar kêna û camêrdêke Êzidî destê DAÎŞî ra xelisyayî

2017-10-31 11:37:23


	 

	Solîn Şengal

	 

	ŞENGAL - Şerwanê QSDî di wayê bi nameyê Xoxê Xelef Xerîb (20), Zadîna Xelef Xerîb(13)  û Asîya Îlîyas Qasim (14), Sahîra Xelîl Xelef (16), Faroq Murad Şemo (15) destê DAÎŞî ra xelisyayî û Şengal de hetê meclisê TAJÊ ra ameyî pêşwazîkerdiş û teslîmê keyeyî înan ameyî kerdiş.

	 

	 Aşma  tebaxe 2014 de fermanêke giran bi sereyê şarê Êzidîyê Şengalî de ame. Êzidî bi qirkerdişê ke pîlî dir rî bi rî mendî. Bi hezaran cinî, doman, pîr û kalî bi destê çeteyê DAÎŞî bi hawayêke wehşet ameyî qetilkerdiş û esîr ameyî girewtiş. No zî verê çimê heme dinya de ame kerdiş. Semedê cinîyê Êzidî heta nika lebatêke cidî hetê hêzê mîyanneteweyî nêame kerdiş.

	 

	Şerwanê QSDî nêzdîyê bajarê Meyadînî de çar kêna û camêrdêke Êzidî ê ke wextê fermanê Şengalî yê 3ê Tebaxa 2014 de hetê çeteyê DAÎŞî ra esîr ameybî girewtiş, ameyî xelisnayîş. Ê ke ameyî xelisnayîş bajarokê Xanesorî yê girêdayê Şengalî, hetê TAJÊ ra ameyî pêşwazîkerdiş.

	 

	Serê nameyê Meclîsê TAJÊ  Edûl Elî dîyar kerde ke Êzidî do têkoşînê xo dewam bikerê û wina va: "Xêrê qehramanê têkoşer ê QSDî  panc domanê Êzîdîxanî ameyî xelisnayîş. Ma zaf hatin spasîyê xo şerwanê azadî rê kenê û şarê xo yê Rojawanê Kurdistanî kenê. Semedo ke ma dir benê hetkar  û ercê xo yê merdimayî bi ca anê. Ma zaf kêfweşê ke ewro panc kesî destê çeteyê DAÎŞî ra ameyî xelisnayîş."

	 

	 'QSD hêvîye şaran o'

	 

	Keyeyê kesê ke esîr ameybî girewtiş hîsê xo wina ardî ziwan: "Ma zaf spas kenê ke QSDî domanê ma çeteyê DAÎŞî ra xelisnayî. Hîn domanê ma ê bînî zî mîyanê destê çeteyê DAÎŞî de yê, ma hêvî kenê ke QSD do înan zî xelas bikero. QSD hêvîye şaran o."

	 

	'Ma hêvîya xo vinî nêkenê'

	 

	Sêvê Îliyase zî hîsê xo wina ardî ziwan: "3ê Tebaxa 2014 ra heta nika mi rojêke weşî nêdî, la ewro xêrê qehremanê QSDî ez kêfweş a û ma hêvî kenê ke domanê ma bînî zî destê çeteyê DAÎŞî ra xelas bikerê. Xêrê qehremanê QSDî ma hêvîya xo vinî nêkenê."