Hepisxane ra name esto: Îhlalkerdişê heqan zaf o, têkoşîn dewam o

2017-10-29 11:20:28


	 

	Esra Aydin

	 

	STENBOL - Canan Ceylane hepisxaneyê Cinîyan ê Bakirkoyî hepsîya, nameyêke eşrawit û bale ant serê îhlalkerdişê heqan ê îdareyê hepisxaneyî. Canane da zanayîş ke heqê pêvînayîşê hepsîyan yeno astengkerdiş, heqê înan weşî yeno xespkerdiş û rastê cigîrayîşê viran yenê. Canane wina va: "Verê heme nê tedayan de xoverdayîşê xo kenê, ma bi hêvîyê ke do têkoşînê xo dewam bikerê."

	 

	OHALî dir îhlalkerdişê heqan ê hepisxaneyî her ke şino zêde beno. Hepisxaneyê Cinîyan ê Bakirkoyî Canan Ceylane nameyêke eşrawit û bale ante serê îhlalkerdişê heqan. Canane dîyar kerde ke pêwa teda înan fek xoverdayîş û têkoşîn ra vera nêdanê.

	 

	Keyeyê mecbur manenê ageyrê

	 

	 Canane da zanayîş ke dimayê KHKan hepisxane de 'heq' nêmendo û wina va: "Xêrcê hepisxaneyî ma tede manenê, heme hepisxaneyan de saetê pêvînayîşî bellî yê. La proseso peyîn de bi sebebê hepisxaneyan hûmare zêde wextê pêvînayîşî de vistê, 35 deqeyan û keyeyî semedê pêvînayîşî kilmî mecbur manenê cayê dûrî ra bêrê. Keye 5 deqe zî erey bimanê nêgînê zere û mecbur manenê ageyrê."

	 

	Canane dîyar kerde ke hepisxane de wextê pêvînayîşî de fotografî yenê antiş, la Bakirkoy de cinîyan rê bi sebebê OHALî no zî ameyo qedexekerdiş û va: "Rengê hakî û lacîvert qedexeyê. Nika sîya zî qedexe kerdê. Eynî wextî de sînyalê yew tîpî cilan zî ferz kenê."

	 

	Problemo en pîl xespkerdişê heqê weşî yo

	 

	Canane peynîye qalîkerdişê xo de wina va: "Hepisxanan de yew zî îhlalkerdişê heqan en pîl, heqê weşîyo. Sewqkerdişê nêweşxanan de problem yenê cuyayîş. Sewqî dimayê aşman ra yenê kerdiş. Embazê ke yenê sewqkerdiş zî bi sebebê sey 'rîng pir o, hûmara leşkeran kêmî yo' tepîya yenê eşrawitiş. Reyna muayeneyê bi kelepçe yenê ferzkerdiş. La verê nê tedayan û caardişan de ma do têkoşînê xo dewam bikerê."