'Pîyê mi bi fermanê Tansû Çîllere ame vinîkerdiş'

2017-10-28 13:02:58


	 

	Zeynep Turgut

	 

	COLEMÊRG - Serra 90am de bi hezaran merdimî ya tepiştiş de ya zî bombardumanan de û ya zî bajaran de ameyî qetilkerdiş. Serra 90an de dimayê vatişê Serekwezîre o wextî Tansu Çîllere 'Lîsteyê karsazê kurdan destê ma de yo' xeylê karsazê kurd ameyî vinîkerdiş. Yew înan ra zî karsazê Geverî Kadîr Keremoglu yo. Domanê Kadîrî qalê pîyê xo kerdî û vatî ke qatilê pîyê înan eşkera yo.

	 

	Serra 90an de verê polîtikayê koçkerdişê û vengkerdişê dewan û bajaran de xeylê merdimî zî ameyî vinîkerdiş û qetilkerdiş. Xeylê kesî bêsebeb ameyê qetilkerdiş. Hema zî qatilê serrê 90an ê Tirkîya nînê hukmkerdiş. Serekwezîra o wextî Tansu Çîllere dimayê ke va 'Lîsteyê karsazê kurdan destê ma de yo' Kurdîstanê xeylê karsazê kurdan bî seydê dewleta tirkan û ameyî qetilkerdiş, vinîkerdiş. Dimayê no vatişî karsazo  bi nameyo Kadîr Keremoglu (60) serre ame tepiştiş û tepiştiş de ame vinîkerdiş. Domanê Kadîrî qalê vinîkerdişê pîyê xo kerdî.

	 

	'Pîyê mi tepiştiş de ame vinîkerdiş'

	 

	Kêna Kadîr Mûhbet Tekîne dîyar kerde ke wexto ke pîyê aye ameyo vinîkerdiş aye hema domane bîya û va ke pîyê aye karsazêke kurd bi û wina qalî kerde; "22 serrî yo pîyê mi vinî kerde yo. Serrê 90an de qirkerdişo en pîl serê kurdan de virazya. Tena vengkerdiş nê bi her hetî serê kurdan de polîtîkayê xo dewam kerdêne. Pîyê mi karsaz bi, dimayê vatişê Tansu Çîllere 'Lîsteyê karsazê kurdan destê ma de yo' pîyê mi ame vinîkerdiş. Çi zirarê merdimêke 60 serre bireso şima? Pîyê mi bi destê dewleta tirkan û bi fermanê Tansû Çîller ame qetilkerdiş. Wexto ke pîyê mi yeno tepiştiş, tepiştiş de yeno vinîkerdiş. Gelo şima çîyê ke winî dîyo? Binê asayîş û ewnîyayîşê dewlete de pîyê mi yeno vinîkerdiş. Tu kes zî nêzano senîn vinî bîyo, ez hema zaf qij bîya. Her wext çimê mi pîyê mi geyrayne. Ma maya xo ra pers kerdêne aye zî nêzanayne ça de yo? Dewlete pîyê mi vinî kerd."

	 

	'Bi zulm dewlete nêeşkena bîyayîşê xo bido qebulkerdiş'

	 

	Mûhbete da zanayîş ke domanîya xo bê pîyê xo derbaz kerdo û va xemgînîya en pîl domanîyêke bêpî bi û wina va: "Dewlete serrê 90an de zulmê xo rîyê xo yê sîya mojna şarê kurdî. Domanan sêwî verdayî, pî û mayan vinî kerdî û qetil kerdî. Cuyayîşî mi de semedê mi xemgînîyê en pîl vinîkerdişê pîyê mi bi. Zerrîya mi zaf veşa. Adirê zerrîya mi qet nêame tefnayîş. Dewlete bi zulm nêeşkena bîyayîşê xo bido qebulkerdiş. Serrê 90an de bi zulm û qetilkerdiş waştêne ma biqedênê. Şima qetilkerd la şima çira vinî kenê? Ez do no zulmî qetî qebul nêkerî. Ma wazenê êdî edelat bêro. Hemverê heme negatîfan zî reyna ma bi hêvîyê."

	 

	'Qatilê pîyê mi Tansû Çîller a'

	 

	Mûhbete da zanayîş kw qatilê pîyê aye eşkera yê û veng da rayedarê hukmatî esteyê pîyê aye bidê ci û wina va: "Ma heme roşanan de xemgîn pêşwazî kenê. Semedo ke ma nêzanê esteyê pîyê mi ça de yê. Bi serran o ma esteyê pîyê xo geyrenê. Dewlete ma rê çîyêk zî nêvana. Qatilê pîyê mi Tansû Çîller a. Ma wazenê faîlî bêrê hukmkerdiş. Heqê ma yo zî ma rîyê edeletî bivînê. Ma fek cigîrayîşê esteyê pîyê xo ra vera nêdanê. Ez veng dana rayadarê dewlete esteyê pîyê mi bidê û qatilî bêrê cezakerdiş."