Şer de en zaf domanî dej ancenê

2017-10-28 12:17:33


	 

	Sêvîn Musa

	MERKEZÊ XEBERAN - Domanêke têmîyankewtişê Sûrîye de dej nêanto çin o. Taybetî zî domanê ke binê veresîye çeteyê DAÎŞî de mecbur mendê bicuyê. Reqa de 4 serran de binê veresîya zulm û îşkenceyê DAÎŞî de mendî en zaf domanan dej ant. Çimê ê domanan de, bi hezaran hîkayeyê bi dej estê. Hîkayeyê veresî ra ters, kuwayîş û gonî esta.

	Hîkayeya veresîye dej û kederî pare Abdullaho 11 serre zî kewt. Ey bi vindîkerdişê keyeyê xo, hîsê tenabîyayîşî emrê xo yê domanî de zerrîya xo de hîs kerd. Binê verasîya wehşetê DAÎŞî de ey heskerdişê û hevîyê verê zerrîya xo, keyeyê xo vinî kerd.

	Abdulah Ebûd 11 serre bi, weşikê verê zerra maya xo û waya xo bi. Eslê xo bajarokê Qibêsînî yê girêdayeyê bajarê Babî bi. Abdulah bi keyeyê xo dir ke maye, pî û 2 wayê û birayêke ci bî pîya cuyayne. Semedê şer û pêrodayîşê ke Babî de vejîyayî, mecbur mendî keyeyê xo dir verê xo bidê Reqa.

	Kanûna serra 2014 de çeteyê DAÎŞî derbazê Reqa bî û sey paytextê xîlafetî xo mojnayî. Wexto ke DAÎŞ derbazê Reqa bi, o wext cuya Abdullah û keyeyê açerya cehenem. Ê bi rîyê DAÎŞî dir rî bi rî mendî.

	Maya Abdullah tofanê ke sereyê înan bêro hîs kerdib ke keyeyê xo rê waştişê vetişê Reqa kerdib û vatibî ke îmkan bibê ma do heme Reqa ra vejîyê ke ya zî ma hîn vejîyê, semeod ke ma heme pîya nêrê kiştiş. Semedo ke o wext DAÎŞî bi topê hewanî eşt keyeyê Abdullah, no waştişê maya ey bi ca nêame. Keyeyê Abdullah pêroyî verê çimanê ey de cuyayîşî rê çimê xo girewtî. Cîranê Abdullah înan resnaynî nêweşxaneyê QSDî û derman kerdî. Peynî de înan ardî nêweşxaneyê Kobanî. 

	Abdullah emrê xo yê qij de, bi vinîkerdişê keyeyê xo dej û kederê ke heq nêkerdib ant. Zerrîya ey ke bi hesretê keyeyê ey perityayne, xemgîn û rincan bi. La destpêkerdişê Hemleyê Xelisnayîşê Bajarê Reqa de 17 teşrîna peyîne 2016 de Reqa hetê Hêzê Sûrîyeya Demokratîk (QSD) ra amî xelisnayîş û xelisnayîş hêvîye zerrîya domanê sey Abdullahî de newe ra zergun bi. Toximê azadî û aştî newe ra serê herre Reqa û zerrîya domanan pîl bî.