Çîyo ke Koycegîz de bî, înfaz û îşkence yo

2017-10-26 11:06:57


	 

	ŞIRNEX -5ê teşrîna verêne de qezaya Koycegîzî ya Mugla de amebî îdîakerdiş ke pêrodayîşêkî qewimîyayo û netîceyê pêrodayîşî de 6 gerîlayî merdî. Nê gerîlayan ra cenazeya Salîh Sanriyî 3 rojî verê Gundikê Melê ya Şirnexî de amebî definkerdiş.

	 

	Ema Sanriyî Vesîle Anika ke cenaze nêweşxane de dîybî, dîyar kerde ke 2 cenazeyê bînî zî morg de yenî vindarnayîş û wina domnaye: “Laşê Salihî de herinda 2 guleyan estbî, nînan ra yewe ginaybî çareyî, yo bîn zî ginaybî maneyê ci. Cenazeyî îşkenceyan ver nêameyêne şinasnayîş.”

	 

	Vesîle dewamê qiseykerdişê xo de va ‘hedîse pêrodayîşî ver nêbîyo, şar yeno xapênayîş’ û wina dewam kerde: “Tam orteyê çareyê ci de herinda guleyî estbî û herinda guleyî sîya bîybî. Televîzyonî û dewlete vatbî pêrodayîş de merdî. Labelê ewja de pêrodayîş nêbîyo. Çimkî merdim cenazeyan ra daxî fam keno. Eke pêrodayîş bibîyêne, do hîna cîya bibîyêne. Heme şopî herinda îşkence û înfazî nîşan dayêne.”

	 

	Înfaz, sîleh û pêrodayîş

	 

	Vesîle arde ziwan ke serranê 90î ra nata dewlete kurdan rê mergî rewa vînena û wina va: “Hende serrî derbaz bîyî, labelê zîhnîyeto qetilkar nêbedilîya. Ma do heta peynî gerrekar bibî. Dewlete hertim eynî çîyan kena. Verê înfaz keno, dima ra sîlehêkî hetê ci de roneno û vano ‘pêrodayîş de merdo’. Destê mi do hertim qirika înan de bibo. Ez do muracatê huqûqî zî bikera.”

	 

	No pêrodayîş nîyo

	 

	Dewijan ra yê ke cenaze dîyo, qisey kerd û wina va: “Laşê Salihî de herinda 2 guleyan estbî. Yew çareyê ci ginabî, yo bîn zî maneyê ci ginabî. Guleyo ke çareyî ginabî herinda ci sûre bî, yo bîn zî herinda ci sîya bî. Laş de herinda îşkenceyî zî estbî. Mi verê cû yê ke pêrodayîş de merdbî, cenazeyê înan zî dîbî. Labelê no wina nêbî.”

	 

	Mîrasê înan do erd de nêmanî

	 

	Azya Çîftçîya ke domanîya ey ra Salîhî şinasnena, wina va: “Salîh keso ke zaf girêdayeyê têkoşînî bî û bi serran o seba nê têkoşînî şer kerdêne. Keyeyê ci domananê xo reyde îftîxar kerdêne. Nê merg û înfazî nêşênî ma rayîrê ma ra biagêrnî. Ma sond wenî ke ma do beyraqa înan dewr bigîrî. Ma do heta peynî têkoşîn bidî û ma do mîrasê înan bidomnî.”