Dayîkê Aştîye: Ma tecrîdî qebul nêkenî

2017-10-25 09:10:07


	ANQARA- Kombîyayîşê grûba HDPyî ra dima Dayîkê Aştîye seba ke Rayberê Şarê Kurd Abdullah Ocalanî reyde prosesê aştî û muzakereyî dest pêbikerî, Serekwezîrî ra pêvînayîş waşt. Dayîkî waştişê xo ra netîce nêgirewtî.

	Dayîkan awanîya Meclîsî bi slogananê ‘wa tecrîd biqedîyo’ û ‘cinî, cuye azadî’ hejnayî. Babete ser o dayîkê aştîye qisey kerdî. Dayîka bi nameyê Cemîle Çîftçîye dîyar kerde ke ganî bi hawayo rew Rayberê Şarê Kurd Abdullah Ocalan keye û avûkatanê xo reyde pêvînayîş bikero û wina dewam kerde: “Cok ra ma ameyî Meclîs. Ganî hemserek û parlamenterê HDPyî ke tewqîfkerde yî, serbest bêrî veradayîş.

	Wa edalet herkesî rê bibo

	Dayîkan ra Reyhan Akgule zî va ‘Meclîs de tena tirkî nê, ganî heme şarî bêrî pawitiş’ û wina domnaye: “Cayê parlamenteranê HDPyî zîndan nîyo, Meclîs o. Ma tecrîdo ke Rayberê ma ser de yeno meşnayîş, qebul nêkenî. Ma aştî, edalet û pîyacuyayîşî wazenî. Eke edalet bêro no welat, wa herkesî rê bêro. Leşker zî ciwanî zî merdimê nê şarî yî. Ma dayîke yî.”

	Dayîke Şemsa Aslane zî arde ziwan ke aye seba ke gonîye nêrijîyo ameya Meclîs û wina va: “Ma seba ke destek bidî parlamenteran ameyî Meclîs. Heqê ma zî estî û ma heqanê xo wazenî.”