Vera îxanetî de  bîyayîşê tilîlîya Bêrîtane...

2017-10-25 09:04:52


	Bêrîtan Hevî

	 “Wexto ke Bêrîtane bi tîlîlîye xo eşte war, cinîyê ke salone pirr kerdbî zî bi tilîlîyan destek daybî tilîlîya Bêrîtane.”

	Têkoşînê cinîyê ke vera sîstemê camêrdê hakimî de danî tena 40 serran reyde sînordar nîyo. Herçiqas ke tarîx qehremanîya înan nênuso zî, cinîyê kurdî wextê xo de serkewtiş û qehremanîyê girdan qezenç kerdî û cuya sosyale ra heta cuya sîyasale, kultur û hunerî ra heta zaf waran de serkewtişê girdi qezenç kerdî.

	Nînan ra yewe zî Gulnaz Karataşe (Bêrîtan Hêvî) ya. Bêrîtane 25ê Teşrîna verêna 1992î de warê Xakurkê yo ke girêdayeyê Başûrê Kurdistanî yo de, netîceyê pêrodayîşêkî de teslîmbîyayîşî qebul nêkerd, xo zinaran ra eşte war.

	Emser serrgêra 25. ya şehadete fermandare Gulnaz Karataşe (Bêrîtan Hêvî) yo. Bêrîtane awanbîyayîşê tarîxê Azadîya Cinîya Kurdî de rolêko tarîxî kay kerdo.

	Bêrîtane warê Xakurkê de bi pêşmergeyanê PDKyî reyde heta guleyê xo yo pêyên şer kena. Serra 1992î donemêko tewr zaf tede îxanet û hemkarîya kurdan aver şona yo. Bêrîtane hertim vera îxanet û nîjadperestîye de nefretêko zaf gird zerrîya xo de kom kena. Ya do zorê înan biberdêne û înan tepîya bidayêne, yan zî do teslîm nêbîyêne.

	Cinîya ke vera teslîmîyetî de sere nêronena

	Bêrîtane teslîm nebiye… Bêrîtane bi xoverdayîşê xo yo tarîxî û bi qehremanîya xo ruhê teslîmnêbîyayîşî awan kerde û bi no hawa şexsê xo de ruhê 25ê Teşrîna verêne awan kerde. Herçiqas ke pêşmergeyanê PDKyî veng dayêne û Bêrîtane ra vatêne ‘Teslîm bibe, ma do çîyêk bi to nêkerî. Ma zî kurd î’ labelê Bêrîtane vera nînan de va ‘ez teslîmê kehenperestîya kurdan nêbena’ û dima ra xo zinaran ra bi tilîlîyan reyde eşte war. Bêrîtane bi nê vindetişê xo bî awankarê xeta azadîye. Çekûyê ke tewr weş qala Bêrîtane kenî û nîşan danî ke vera teslîmîyetî de sere nêronena, hetê aye ra ameyî nuştiş. Bêrîtane wina nuşta: “Şer bike gula mi, xo bişidêne. Çimkî ma bi şerkerdişî estî. Ma bi şerkerdiş rind benî, zêde benî û ma bi şerkerdişî hes kenî. Ez seba ke bida dişmeno ke hêvî, roje û adirî ra terseno ro şona.” Bêrîtane nê nuşteyê xo de nîşan daya ke aye sîmgeya xoverdayîşî ya.

	Îşkenceyanê girdan û mergî gêna xo çim û kewena rayîr

	Bêrîtane her ke şer kena hêvîya estena kirîşena. Bêrîtane sond wena ke do koletî, qirkerdiş û qetlîyamê ke seba cinîyanê kurd û şarê kurdî rê rewa yenî dîyayîş bişikno. Bêrîtane seba ke bişînbo bi nasnameyê xo yo kurdîtî estene xo îspat bikero, îşkenceyanê girdan, zulm û mergî gêna xo çim û kewena rayîr. Bêrîtane sey cinîyêka xoverdekare ya Dêrsimî yena zanayîş û Bêrîtane xo qîrayîşê cinîyanê ke Qetlîyamê 38î de xo kaşan ra eştî war de gêrena. Bêrîtane hêrsê xo bi qîrayîşê nê cinîyan gird kena û wina vana: “Demêko nizdî de do koyan de serewedaritişê ameyoxêka roşne pê bêro, aye roje do dejî biaçarîyî serewedaritiş.” Bêrîtane bi nê vatişî vera xo dana koyan.  Bêrîtane ewil nameyê Binevşe bi kar ana, dima ra seba ke o name sewbîna embazê aye girewto, nameyê eşîra Bêrîtanî gêna û kena nameyê xo yo qod.

	Ez teslîm nêbena

	Bêrîtane PKK de demêko derg karê çapemenîye reyde mijul bena, dima ra nêwazena na xebate de ca bigîra. Bêrîtane wazena warê şerî de ca bigîro. Herçiqas ke aye ra yeno waştiş ke wa cepheyê apey de bivindero zî, Bêrîtane vera hêrişê ke Başûrê Kurdistanî de dest pêkenî de cepheyê tewr vernî de şer kena. Hîkayeya Bêrîtane bi kameraya Halîl Dagî erzîyena pratîk, yewa yewe ê vîstê ke ameyî eşnawitiş, yenî vera şarê kurdî. Wexto ke fîlm ame weşênayîş, ez salon de bîya û mi dî ke aye salone de ti kesî nêşênaybî hakimê hesiranê xo bibî. Dima ra cinîyê ke salone de bî, bi tilîlîyan destek daybî tilîlîya Bêrîtane. Aye salone de çîyo ke mezgê herkesî de mend, cewabo ke Bêrîtane daybî îxanetkaran bî. Bêrîtane vera kesê ke mîyanê îxanetî de bîyî rê wina vatbî: “Şima dişmenî reyde ortaxî kerd, şima Başûr ra hêrişê şorişê Vakurî kenî, şima xayîn î, ez teslîmê şima nêbena.”

	Bêrîtane serra 1992î de îxanet tede hakim o de bi çalakîya xo bi hezaran pêşmergeyî ser de tesîr kerda. Bêrîtane tena bi nêy zî nêmenda, zafaneyê domananê Kurdistanê Vakurî de zî xo daybî cuyayîş. Roja ma ya ewroyî de hewl dîyeno ke îxanetê 92î reyna bierzîyo dewre. Cok ra ganî ewro vindetişê Bêrîtane bêro vîra herkesî. Goreyê mi no do bibo cewabê donemî…