'Ganî cinîyê çar parçeyê Kurdistanî biwerzî payan ser'

2017-10-24 12:36:52


	 

	Hikmet Tunç

	 

	WAN – Tecrîdo girankerde ke Rayberê Şarê Kurdî Abdullah Ocalanî de yeno meşnayîş, dewam keno. Badê ke medyaya komelkî de tayê xeberî vejîyayî ra dima, seba ke Ocalanî reyde pêvînayîşî bibî, muracat ameybî kerdiş, labelê heta nika cewabêko bîyaye nêdîyayo.

	 

	Vera tecrîdî de Tevgerê Cinîyanê Azadan (TJA) û Meclîsê Cinîyan yê HDPyî bi şîyarê ‘Tecrîd do vînî bikero, azadî do qezenç bikera’ kampanyayêk daybî destpêkerdiş. Babete ser o cinîyê Wanî qisey kerdî.

	 

	Cinîyan ra Behîce tuncere va ‘kampanya ma de heyecanêkî viraşta’ û wina dewam kerde: “Ma ancax bi têkoşîn şênî tecrîdî derbaz bikerî. Ma hertim hetê aştîye de bîyî, labelê aştî heta ke Rayberîya ma azad nêba, mumkin nîya. Ma çareserîye AKPyî ra hêvî nêkenî, Ma aştîye zî û azadîya xo zî ancax bi piştîdayîşêyewbînan şênê qezenç bikerî. Cok ra ma do pîya têkoşîn bidî.”

	‘Azadîye bi azadîya Rayberîye mumkin a’

	 

	Cinîyan ra Fatma Dumane zî dîyar kerde ke tecrîd tena Rayberê Şarê Kurdî Abdullah Ocalanî ser de nîno meşnayîş û wina va: “Domanê ma yê zîndanan ser de zî tecrîd yeno meşnayîş. Şiknayîşê ber û asinanê zîndanan ancax bi têkoşînê cinîyan mumkin o. Têkoşînê ma heqdar o. İnşallah peynîye de ma do qezenç bikerî. Bê Rayberîye ma nêşênî qala azadîye bikerî. Azadîya ma ancax bi azadîya Rayberîye mumkin a.”

	 

	Êdî no wina nêşono

	 

	Helîme Orhane zî wina va: “Ganî cinîyî bi şewe û roje vera tecrîdî de payan ser de bî. Êdî bes o. Ganî cinîyî keye de nêronîşî û doman û cîrananê xo rê qala tecrîdî bikerî. Ma azadîya Rayberîya xo wazenî. Heme bajarê Kurdistanî bi polîtîkayanê îmhakerdişî yenî çinîkerdiş. Domanê ma bi hawayo neheq erzîyenî zîndan. Ganî ma cinîyî bişînbî nê şîyayîşî bivindarnî.”

	 

	Seba vejîyayîşê ziqaqan ma paweyê çi yî?

	 

	Leyla Dumane zî va ‘ganî seba şiknayîşê tecrîdî cinîyî sere wedarnî’ û wina domnaye: “Ewro saya perspektîfê Ocalanî cinîyî pîya hereket kenî. Ganî cinîyî çar parçeyê Kurdistanî de sere wedarnî. Heta key do bêveng bimanî? Her roje domanê ma kişîyenî. Eke Rayberîya ma azad nêbo, domanê do bikişyî. Rayberîya ma binê tecrîdêko girankerde de yo. Seba vejîyayîşê ziqaqan ma paweyî çi yî?