'Helbet peynîya zaliman zî do bêro'

2017-10-24 12:18:32


	 

	Şehrîban Aslan

	 

	AMED – Tayê taxê ke girêdayeyê qezaya Sûrî ya Amedî de qedexeyo ke 1 serrî ra zêde yo ke esto, dewam keno. Taxê Alîpaşa û Lalebeyî ke tede qedexe çin o, ewja de neheqî û rijnayîş dewam kenî.

	 

	Şarê taxan zî dîyar kenî ke ê do vera rijnayîşê dewlete de keyeyê xo ra nêvejyî û na çarçewa de veng danî herkesî.

	 

	Taxê Alîpaşa û Lalebeyî de rijnayîş bi hawayo lez dewam keno û seba ke welatîyî bêçare bêrî verdayîş, heme çî yeno kerdiş. Welatîyî verê bêawe û bêcereyan ameyî verdayîş, nika zî bi hawayo zorî keyeyanê xo ra yenî vetiş û koçê sewbîna semtan yenî kerdiş. Welatîyê ke keyeyanê xo ra nêvejîyenî, hetê polîsan ra yenî tehdîtkerdiş. Heto bîn ra keyeyê ke ameyî rijnayîş, herinda înan de bingeyê awanîyê ke do bêrî viraştiş, yenî eştiş. No het de seba ke reaksîyonan kêmî bikerî, dormeyê taxan bi barîyeranê berzan girewtî.

	 

	‘Ma nêwazenî keyeyê xo ra bivejyî’

	 

	Keyeyo ke binê barîyeran de çadir ronayo, vera rijnayîşî de cuya xo çadir mîyan de domneno. Yê ke çadiran de cuyenî, kesê ke înan ra vanî ‘şêrê bankayan ra pereyê xo bigîrê û tîya ra bivejyî’ rê vanî ‘ma rê çi pere lazim o û çi zî çîyêko bîn yê madî. Ma nêwazenî keye û erdê xo ra bivejyî.”

	 

	Keyeyoke bîn zî wina vano: “Tîya sey qesrî yo, mi keyeyê xo bi çi xeyalan viraştbî. Bêrê ez şima bigêrnî, şima do fam bikerî. Mi banêko 2 qatin viraşt. Ma fikirîyayî ke ma do tede bi zerrba xo bimanî. Labelê destûr nêdayî. Nika dore ameyo keyeyê mi. Mi tede çîyêk nêverda. Ma bi zulmêko gird erdê xo ra erzîyenî. Labelê wa ti kes nêvajo qey no zulm înan rê maneno. Peynîya Fetoyî se bî, do peynîya Erdoganî zî wina bibo. Erdogan helbet rojêko îqtîdar ra bikewo. O wext do hesabê nînan bido. O vano qey do dinya ci rê bimano, labelê na dinya ti kesî rê nêmende, hele zulmkaran rê qet nêmende. Ma Sûr de yî û ma do nêvejyî.”