'Ma do cuyêka bêrayberîye qebul nêkerî'

2017-10-22 10:19:42


	 

	ŞIRNEX- Tecrîdo ke Rayberê Şarê Kurd Abdullah Ocalanî ser de yeno meşnayîş dewam keno, heto bîn ra muracatê keye, avukat û yê heyetî yenî astengkerdiş. Heto bîn ra çend rojî verê derheqê Ocalanî de tayê xeberê nêbaşî ameyî vilakerdiş.

	 

	Nê xeberan ser ro Serdozgerîya Komare ya Bursaye îzehetêkî dabî. Labelê şarê kurd û dostê ci nê îzehetî ra îkna nêbî; cok ra sere de Ewropa de û cayanê cîya-cîyayan yê Kurdistanî de vejîyayî raşteyan û dest bi protestokerdişî kerdî.

	 

	Babete ser o dayîkê şirnexijî qisey kerdî û vera nê xeber û tecrîdî de reaksîyon nîşan dayî. Dayîkî qiseykerdişê xo de qala polîtîkayê tewqîfkerdişî yê dewlete kerdî û dîyar kerdî ke ganî bi hawayo lez pêvînayîş bibo.

	 

	Heta Rayberî azad nêbo, ma zî azad nêbenî

	 

	Dayîkan ra sifteyîn Ferîde Malgaze qisey kerde. Ferîde va ‘seba ke qedîyayîşê kaosî, ganî Ocalanî reyde pêvînayîşî bibî’ û wina dewam kerde: “Reyna ganî rayîrê azadîya Ocalanî bêro akerdiş. Heta ke Ocalan azad nêbo, ti kes azad nêbeno. Wazenî sebrê kurdan biceribnî. Wa wina nêkerî. Rayberîye seba xeta sure ya. Wa Rayberê ma verabidî, ma sewbîna çîyêk nêwazenî. O rayberê Kurdistanî yo. Ma tena wazenî ke wa azade bibo. Ma çiqas vanî aştî, ê hende zîndanan pirr kenî. Ma nêwazenî gerîla û leşkerî bimirî. Ma azadî û heqê xo wazenî.”

	 

	Şarê Şirnex, Silopî payan ser de yî

	 

	Ferîde dewamê qiseykerdişê xo de bale ante ser zext û zorê dewlete û wina va: “Herçiqas ke hende zext û tedayî estî, reyna zî şar payan ser de yo. Ê se bikerî zî ma do payan ser de bibî. Çi Cizîr, çi Silopî û çi zî Şirnex do qet nêkewî. Ma tîya de yî û ma do hertim baş bibî. Ma vera tecrîdî çi destê ma ra bêro ma do bikerî. Ma cinîyî heta peynî xover bidî.”

	 

	Hayat Ucaye zî wina va: “Ganî Ocalano ke xeta sûre ya şarê kurdî yo, bêro veradayîş. Tecrîdo ke Ocalanî ser de yeno meşnayîş, şaran ser de yeno meşnayîş. Ma cinîyî qet do sere nêronî. Ê wazenî hêrs û sebrê şarê kurdî pêmawî. Ma cuyêka bê Rayberî qet qebul nêkenî û ma do nêkerî zî. Eke xeberêka xirabe bêro, heme kurdî û dostê înan werzîyenî payan ser. Eke ê nêwazenî çîyê sey 99î bêrî cuyayîş, ganî pêvînayîşî bibî. Seba aştîye ganî tecrîd bêro wedarnayîş û Ocalan azade bibo. Kaos tecrîdî ver beno. Aştî zî ancax bi wedarnayîşê tecrîdî beno. Heta ke erey nêbîyo, ganî Rayberîya ma reyde pêvînayîş bêro kerdiş.”