'O maden tena pîyê ma nê, xeyalanê ma zî girewtî'

2017-10-20 13:35:56


	 

	ŞIRNEX- 4 rojî vere ocaxêkê madenî de cînayetê karî virazîyabî û netîceyê ci de 7 karkerî merdbî. Karkeran ra Ugur Kabako 17 serreyî ke birîndar o, tedawîya ey dewam keno.

	Babete ser o merdime karkeran qisey kerdî. Dayîka Abdullah Kayaşî Bedrîya Kayaşe va ‘ez do dejê lajê xo vîra nêkera’ û wina dewam kerde: “8 domanê lajê mi do se bibî? Lajê mi 17 serrî bî ke maden de xebetîyayêne. Seba domananê xo xebetîyayêne. Çira tedbir nîno girewtiş? No qeder nîyo. Ez nêşêna dejê xo vaja. Do keyeyê bînî se bikerî?”

	Seba ke sewbîna kar çinêbî, şîyêne

	Cinîya Abdullahî Perîhan Kayaşe zî va ‘lajê mino şenik nêzano pîyê ci merdo’ û wina domnaye: “Mêrdeyê mi xeyalê xo nêdî û şî. Mêrdeyê mi kar gêrayêne, labelê nêdîyêne. Heme domanê mi şîyênê mekteb. Mêrdeyê mi badê ke bi serran xebetîya, nê keyeyî viraşt. Ez do nika se bikera?”

	Lajê Abdullahî zî dîyar kerd ke ê tena pîyê înan nê, xeyalanê înan zî girewtî û va ‘ma do keyeyê xo newe ra biviraştênê, no dej do senî derbaz bibo? Eke ez zî kar nêvîna şêra maden de bixebetîya’.