Feleknas Uca: Ocalan xeta sûre ya şarê kurdî ya

2017-10-20 12:34:23


	 

	Şehrîban Aslan

	AMED –Tecrîdo ke Rayberê Şarê Kurdî Abdullah Ocalanî ser de yeno meşnayîş dewam keno, pêvînayîşê keye û yê avûkatan zî yeno redkerdiş.

	Heto bîn ra 15ê Temmuze teşebusê derbe ra dima xeberê ke cuya Ocalanî tehluke de yo ameyêne vilakerdiş, çend rojî verê cû zî medyaya komelkî ser ro derheqê mergê Ocalanî de xeberî ameyî vilakerdiş. Herçiqas ke Serdozgerîya Komare ya Bursa îzehet daye, reyna zî şarê kurd û dostê ci Kurdistan û Ewropa de payan ser de yî.

	Babete ser o Parlamentera HDPyî ya Amedî Feleknas Ucaye qisey kerde. Feleknase va ’19 serrî yo ke şexsê Ocalanî de 40 mîlyon kurdî rehin yenî girewtiş’ û wina dewam kerde: “Bi serran o Birêz Ocalan keye û avûkatanê xo reyde pêvînayîşan nêkeno. Tewr peynî Ocalanî birayê xo Mehmet Ocalanî reyde pêvînayîşî kerdbî, labelê no qîm nêkeno.”

	Bawerîya ma îzehetê dozgerî nîno

	Feleknase dewamê qiseykerdişê xo de va ‘şarê kurd dormeyê Rayberîya xo de bîyî xelqa û dewlete mecbûr mende pêvînayîş bido kerdiş’ û wina domna. Ewro sînorê Rojhelato Mîyanênî newe ra dîyar benî û seba Rayberî fikre xo nêaro ziwan, ey ser de tecrîd yeno meşnayîş. Herkes zano ke Ocalan seba şarê kurdî çiqas muhîm o. Dewlete zî zana ke Rayber Apo seba şarî xeta sûre yo. Bawerîya ma bi îzehetê dozgerî nîno. Heta ke keye û avûkatê ci reyde pêvînayîşî nêbî, bawerîya ma nîna.”

	Rayberîye îradeyêka girde nîşan daye

	Feleknase dîyar kerde ke Ocalanî mîyanê 4 dêsan de îradeyêka girde nîşan daû wina va: “Serekwezîrê Tirkîyaye wextê pêvînayîşan de silamanê xo Ocalanî rê vatêne. Heme selahîyetdarê dewlete pêvînayîşan ra qayîl bî û fikir, kitab û notê pêvînayîşî taqîp kerdêne. Rojhelato Mîyanên de, Amerîkaya Latîne û Ewropa de kitabê Ocalanî açarîyayî ziwananê bînan.”

	Roje roja wayîrvejîyayîşî ya

	Feleknase qiseykerdişê xo wina qedênaye: “Wextê komploye de bi desan merdimî bedenê xo veşnayî. Ocalan hetê bi mîlyonan kesan ra sey rayberî yeno zanayîş. Wexto ke mesajê Ocalanî Newroza Amedî ame wendiş, her cayê dinya ra heyetî ameybî. Eke çîyêk bêro sereyê Rayber Apoyî, berpirsîyar CPT û hukmatê AKP yo. Ganî sere de Kurdistan û metropolanê Tirkîya de ma dormeyê Rayberîye de bibî yewe. Roje roja wayîrvejîyayîşê Rayberîye yo.”