Meral Danişe: Problemê Kerkûkî ancax bi yewîye çareser beno

2017-10-20 12:25:45


	 

	Fîlîz Zeyrek

	 

	EDENE-Referandûm ra dima bi talîmatê PDK û YNKyî Kerkûk teslîmê artêşa Iraqî û hêzê Haşdî Şabî ame kerdiş. Na rewşe ver reaksîyonê şarî dewam keno.

	 

	Babete ser o Parlamentera HDPyî ya Edene Meral Daniş Beştaşe qisey kerde. Merale dîyar kerde ke ewro Kerkûk sey bazarêko hetê mîyanneteweyî de pare bikerî, yeno dîyayîş û wina va: “Nêwazenî kurdî îdareyê na herême de ca bigîrî. Heto bîn ra nêwazenî ke kurdî bibî wayîrê statuyêkî. Verê cû trajedîyêka winasî Şengal de ameybî cuyayîş. Hêzê Şengal caverdaybî û remaybî, Kerkûk zî caverdayî. Ganî merdim îdareyê Iraqî ra biperso, çira hende vera kurdan de vindetişêko wişk nîşan danî?”

	 

	Merale dewamê qiseykerdişê xo de va ‘nika kaosêkî yeno cuyayîş, tena çareserîyêka nê kaosî esta, o zî yewîya neteweyî ya’ û wina domnaye: “Seba nê zî ganî partîyê herême gaman bierzî. Nika kurdan de hetê moral û motîvasyonî de problemê girdi yenî cuyayîş, çareserîya probleman ancax bi yewîya neteweyî mumkin o. Merdim nêşeno dagîrkerdişê Kerkûkî qebul bikero, çimkî muameleyêko merdimîye nîyo. Ewro bi hezaran merdimî erşawîyayî surgun û cîyayîya nê û yê kerdişanê DAIŞî de ti ferq çin o.

	 

	Hêzê mîyanneteweyîyî benî ortaxê sucî

	 

	Merale qiseykerdişê xo de bevengmendişê hêzanê mîyanneteweyîyan rexne kerde û wina va: “Wexto ke babete bena kurd wa xo kor, ker û lal nêkerî. Vizêr yê ke vera Helebçe de bêveng mend, yê ke Şengal de koçkerdişê bi sehezar êzidîyan rê bêveng mendî ewro zî vengbîyayîşê Kerkûkî rê bêveng manenî û benî ortaxê nê sucî.”