'Seba ke kaos nêbo ganî pêvînayîşî bêrî kerdiş'

2017-10-19 12:11:35


	 

	Şehrîban Aslan

	 

	AMED- Rayberê Şarê Kurd Abdullah Ocalan 6 serrî yo ke nêşêno avûkatanê xo reyde pêvînayîş bikero, reyna yew serrî ra zêde yo ke nêşêno keyeyê xo reyde zî pêvînayîş bikero. Heto bîn ra çend rojî verê derheqê weşîya Ocalanî de tayê melumatî medyaya komelkî ser de ameyî parekerdiş.

	 

	Serdozgerîya Komare ya Bursa herçiqas ke babete ser o îzehetêkî daye, reyna zî rayapêroyî no îzehet ser o îkna nêbî. Babete ser o Endama Dîvanê Kongreya Komelê Demokratîkî (KCD) Salîha Aydenîze qisey kerde.

	 

	Salîha va ‘Ocalan şexsîyetêko normal nîyo’ û wina dewam kerde: “9ê Teşrîna verêne de prosesêko komploye dîya destpêkerdiş û o proses hîna dewam keno. Ocalan 6 serrî yo ke avûkatan reyde, yew serrî yo ke zî keyeyê xo reyde pêvînayîş nêkeno. Nika tecrîdo ke teke ci dinya de çin o yeno meşnayîş. Dinya de zîndanê Guantanamo û sewbîna sey nimûne yenî dayîş, labelê ewja de daxî heqê pêvînayîşî û mektube esto. Labelê Îmrali de sîstemêko cîya esto. Ocalan şexsîyeto ke bi mîlyonan kesan sey ‘îradeya min o’ qebul kerdo yo. Bi rojan o seba ewleyî, weşî û azadîya ci merdimî rasteyan de yî, labelê dewlete bêvengîya xo pawena û na zî yena manaya ke komplo dewam kena.”

	 

	Bi mîlyonan kesî meraq kenî

	 

	Salîha va ‘par wextê teşebusê derbe û çend rojî verê zî derheqê Ocalanî de tayê xeberî vejîyayî’ û wina domnaye: “Seba şexsîyetêko winasî, îzehetê ercanî nînî qebulkerdiş. Cok ra îzehetê Serdozgerîya Komare ya Bursa kêmî yo. Ganî avukat an zî keye şêro pêvînayîşî û melumatan rayapêroyî reyde pare bikerî. Weşî û ewleyîya Ocalanî, eynî wext de yenî manaya weşî û ewleyîya şarî zî û ganî no qet nêro vîrîkerdiş.”

	 

	Ganî keye û avûkatî pêvînayîş bikerî

	 

	Salîha dîyar kerde ke şarê Mezopotamyayî Ocalanî xo rê sey Ocalanî vînenî’ û wina va: “Sîstemê tecrîdî şero ke Rojhelato Mîyanên de esto ra cîya nîyo. Şerê Dinya yê 3. xora parçeyêkî komplo yo. Derheqê weşî û ewleyîya Birêz Ocalanî de gumanê tewr şenikî daxî beno sebebê cîyayan. Xora vere cû zî çîyê winasî ameybî dîyayîş. Seba ke nika ra pey kaos nêbo, ganî bi hawayo rew derheqê weşî û ewleyîye de melumat bêro dayîş û pêvînayîş bêro kerdiş.”