'Barzanî nêşêno qezencanê şarî teslîmê Heşdî Şabî bikero'

2017-10-19 12:10:18


	 

	Zeynep Turgut/Dîlan Babat

	 

	WAN- 15ê Teşrîna verêne de artêşa Iraqî û hêzê Heşdî Şabî hêrişê Kerkûkî kerdî. Bêxera tayê gerîlayî û pêşmergeyê zerrîwaştoxan ti kes Kerkûk de xover nêdaybî. Bitaybetî pêşmergeyê PDK û YNKyî fek pawitişê bajarî ra veradaybî û remaybî. No remayîş bîbî sebeb ke Kerkûk û çend bajarê Başûrê Kurdistanî bêrê dagîrkerdiş.

	 

	Cinîyê Wanî derheqê na rewşe de qisey kerdî û qala îxanetî kerdî. Cinîyan ra Saîme Surmeye dîyar kerde ke kurdî bi serran o ke Rojhelato Mîyanên de xover danî û wina va: “Çîyê ke Kerkûk de ameyî cuyayîş, nînê qebulkerdiş. Beno ke cinîyî reyna qetlîyam, tecawiz û sewbîna reyde têrî bimanî. Nê pêrodayîşî tena Îran, Iraq, Kerkûk, Mexmûr û Şengalî ser de tesîr nêkenî. Na rewşe do siba disibayî Tirkîya de zî xo nîşan bida. Cok ra do heme Rojhelato Mîyanên ser de tesîr bikero. Ganî şarê kurd yewîya xo awan bikero û pawitişê xo bikero.”

	 

	Lazim o şar herra xo nêterikno

	 

	Rafîya Cîvakliye zî va ‘bi serran o ke kurdan ser de polîtîkayê zextî estî’ û wina dewam kerde: “Barzanîyî wina da kerdiş ke heme qezencê xo teslîmê Heşdî Şabî kerd. Ganî bi ti hawayî şarê Kerkûkî fek herra xo ra veranêdo. Ma eşkenî pawitişê xo bikerî. Senî ke ma Şengal û Kobanê de xo pawit, ma Kerkûk de zî eşkenî xo bipawî.”

	 

	Îxanet do nêro vîrîkerdiş

	 

	Kiymet Çîçeke zî va ‘hêzê emperyalîstî nêwazenî kurdî bibî wayîrê statuyêkî’ û wina domnaye: “Ganî kurdî bibî yewe û nê hêrişan rê bibî cewab. Şarê Şengalî bi hêzê xo pawitişê xo kerd. Nika Şengal, Kobanê û Reqqa DAIŞ ra ameyî pakkerdiş. Şarê kurd şarêko xoverdakar o. Eke kurdî bibî yewe eşkenî serbikewî. Labelê kurdî do nê îxanetê Kerkûkî xo vîra nêkero.”