Kerkûk de şaran anî dûştê yewbînan

2017-10-18 10:18:18


	 

	STENBOL- Artêşa Iraqî û hêzê Heşdî Şabî hêrişê Kerkûkî kerdî. Vera nê hêrişî de gerîlayê HPG û YJA Starî, pêşmergeyê ke nêremayî û şar xeta pawitişî ame awankerdiş. Na xeta pawitişî badê ke hêzê asayîşî yê PDKyî awanîyê asayîşî teriknayî, şikîyaye.

	Şarê herême vera remayîşê PDKyî de reaksîyon nîşan da û seba ke raştê qetlîyamî nêro, mecbûr mend bajar biterikno. PDK tena Kerkûk de nê, Mexmûr û Şengal de zî meterîsanê xo terikna û herême Heşdî Şabî rê verda û şî.

	Babete ser o Hemsereka Partîya Newe ra Rizgarbîyayîşî ya Sosyalîste Tulay Hatîmogullariye qisey kerde. Xeta ke Mûsil destê DAIŞî ra girewte, ganî ewro nêkewo pozîsyonê DAIŞî.”

	No pêrodayîş karê hêzê hêreme rehet nêkeno

	Tulaye bale ante îxtîmalo ke hêze emperyalîstî herême şerî kûr bikerî ser û wina va: “Gelo sebebê esasî yê şerê herême pêrodayîşê hêzê emperyalan ra nîyo? Na rewşa pêrodayîşî kare hêzanê herême asan nêkeno. Şarê kurd êdî herême de estene ra zêdeyêr, statuyêkî wazeno. Îdareyê Iraqî û welatê bînî ganî nê heqê kurdan bivînî. Tena rayîrê xirakerdişê hêzanê emperyalan meşnayîşê polîtîkayê demokratîk û aştîyan mumkin o. Herême şer û şîddetî ver zaf zirar dîye. Hetê ekonomîye de vînî kerde. Seba vindarnayîşê nê şerî, ganî çend kesî bimirî, çend cinîyî raştê tecawizî bêrî û bazar de bêrî rotiş?”

	Raştîya kurdan xo dana ferzkerdiş

	Tulaye dîyar kerde ke sebebanê operasyonê Kerkûkî ra yewe zî Îran wazeno ke şerî bivejo teberê sînorê xo yo û wina va: “Merdim tena bi biratîye eşkeno etirîyayîşê şarê herême orte ra wedarno. Kerkûk de ereb, kurd û tirkmenan ardişê têver, do herême hîna zaf bideko mîyanê kaosî. Ganî fek na şaşîye ra verabidî. Tarzê leşkerîyî herinda çareserîye hîna zaf problem vejenî. Tarîx bi nê nimûneyan pirr o.  Iraq, Îran, Sûrîye û Tirkîya de raştîya kurdan xo dana ferzkerdiş. Waştişê ma yo tewr gird o yo ke şarê herême bi hawayo azade û bi biratî bicuyî.”