Vengê ma dêsanê zindanî recifna û resa Nurîye û Semîhî 

2017-10-13 14:16:56


	 

	HABÎBE EREN

	 

	ANQARA- Çalakîya grevê vêşanî ya Nurîye Gulmene û Semîh Ozakçayî ke seba agêrayîşê kare xo daybî destpêkerdiş, roja 220. de dewam kena. Çalakîya Cehdeyê Yukselî ke seba piştîdayîşê Nurîye Gulmene û Semîh Ozakçayî yena kerdiş zî roja 340. de dewam kerde.

	 

	Heta nika hetê xeylê kesan ra çalakîyê destekî ameyî dayîş. Nînan ra yewe zî çalakîya mamosta Nazîfe Onaye ya. Nazîfe Onaye zî seba ke karê xo ra ameybî îxraçkerdiş, 7ê sibate de dest bi xoverdayîşî kerde. Verê cezaya hepsê keyeyî dîyaye aye, labelê seba ke aye ceza red kerde ameybî tewqîfkerdiş. Nazîfe zî çalakîya Cehdeyê Yukselî de bi desan reyan ameybî tepiştiş û raştê îşkenceyî ameybî.

	 

	Nazîfe Onaye Zîndanê Sîncanî ra mektubêkî erşawite. Nazîfe va ‘herçiqas ma Nurîye reyde eynî kampus de manenî, reyna zî ma ancax rojêkî dima ra eşnawite ke Nurîye sewqî Nêweşxaneyê Numune’ û wina dewam kerda: “No zî dûştê tecrîdî nîşan dano. Veradê kampusî xebera merdimî embazê merdimî ra nêbena.”

	 

	Nazîfe dewamê mektuba xo de wina va: “Kulturê ma piştîdayîş û cîrantî nîşanê ma dano. Zîhnîyetê tecrîdî ma de çin o. Eke wina bo, ma hepsîyî zî do rayîrê derbazkerdişê dêsanê tecrîdî bigêrî û şert û mercî çiqas giran benî wa bibî, ma do çareserî bivînî. Ma 80 hepsîyê ke zindan de yî, seba piştîdayîşê Nurîye Gulmene û protestokerdişê hêrişan çalakîye viraşt. Dima ra ma bi pirodayîşê beran çalakîya xo domnaye. Ma bawer kenî ke vengê ma yo ke dêsanê zindanî leqna, resayo Nurîye û Semîhî. Ma heqdar î û ma do qezenç bikerî.”