Şarê Sûrî şert û mercê zehmetinan de xover dano

2017-10-12 13:00:30


	 

	Duygu Ciniviz

	AMED- Taxê Alîpaşa û Lalebeyî yê qezaya Sûrî ya Amedî de rijnayîş dewam keno. Roja 23ê gulana ke rijnayîş dest pêkerdbî ra nata ge-gane cereyan dîyeno taxan û şar xoverdayîşê xo domneno.

	Hetkara Sekreterîya Pêroyî ya TMMOBî Gulsum Sonmeza ke seba destek dayîşê taxijan sûrijan ziyaret kerde, qisey kerde. Sonmeze va ‘halê Sûrî ma ser de zaf tesîr kerd, xora nika heme ameyo rijnayîş. Ganî cayê ke Warê SÎTî ameybî îlankerdiş de planê pawitişî yê taybetî bibîyêne û dewlete nê cayan seba şarî newe ra bivirazo. Dewlete bi hawayo zorî şarî Sûr ra vejena. Bi vayêka erjane keyeyan ra herînena û şarî ca û warê înan ra koçber kena. Sûr de neheqîyêka girde esta.”

	Sonmeze dîyar kerde ke manaya sembolike ya Sûrî seba Amedî esta û wina va: “Ewro wazenî mîrasê kulturî û tarîxî yê Sûrî çinî bikerî û no vînîbîyayîşêko gird o. Nika Sûr de dormeyê taxan bi perdeyanê asinan ameyo girewtiş û no zî seba nimitişî yeno kerdiş. Ma nika paweyê netîceyê muracatanê keyeyan î. Ma heme bawerîya xo biratîya şaran anî.”

	Tîya de azadîye çin a

	Sereka Grûba Xebata Cinîyan ya TMMOBî Hanze Gokare zî va ‘ez reya sifteyîne ya ke yena Amed’ û wina domnaye: “Reya sifteyîne ya ke ez dejî hende nizdî ra hîs kena. Ma sey ekîbî xeylê kesan reyde pêvînayîşî viraştî. Zafaneyê welatîyan herçiqas şert û merc zehmetin bibî zî xover danî û ca û warê xo nêteriknenî. Merdimî nêvanî zimistan û hamnan vera bêcereyanî de xover danî. Tîya de kulturêkî esto, labelê nê heme bi kepçeyan yenî çinîkerdiş. Ganî herkes vera nê rijnayîşî de hesas bibo. Merdim çiqas eşkeno bêawe bicuyo. Tîya de zafê çîyan bi hawayo zorî yenî kerdiş û merdimî bi zor keyeyê xo ra yenî vetiş.”