Şerwanê azadî doman û cinîyê êzidîyan destê DAÎŞî ra xelisnayî

2017-10-11 12:11:54


	 

	Ehlam Hecî-Delîla Axîn

	 

	ŞENGAL - Bi têkoşîn û xoverdayîşê şerwanê azadî, cinî û domanê êzidî deste çeteyê DAÎŞî ra yenê xelisnayîş. Bi nê xoverdayîşî 2 cinîyê bînî û domanêke bajarê Dêrazorî ra destê DAÎŞî ra xelisyay. Cinî û domanê ke ameyî xelisnayîş, Şengal de ê û keyeyê xo bi kêfxweşî û bi coşêke pîl resay yewbînan.

	 

	Bi xoverdayîş û cengewarîyê şerwanê azadî her roje cinî û domanê êzidî destê çeteyê DAÎŞî ra yenê xelisnayîş. Verê çend rojan di cinî û domanêke bajarê Dêrazorî de destê çetayê DAÎŞî ra ameyî xelisnayîş. Cinî û domanê ke ameyî xelisnayîş, serê herre pî û kalan Şengal de resayî keyeyê xo. Dimayê ke ê û keyeyê xo resayî yewbînan, merkezê meclîsê bajarokê Xanasorî girêdayê Şengalî yo şîranî yewbînan rê vila kerdî û qiseykerdiş ame kerdiş.

	 

	Serê nameyê Tevgerê Azadîya Cinîyê Êzidî (TAJÊ) Zahra Silêmane qisey kerde û dîyar kerde ke aye sere de sey cinîyêke êzidî  bixêrameyîşê kesê ke destê çeteyê wehşî ra ameyî xelisnayîş kena.

	 

	Dişmin bi ser nêkewt

	 

	Zehra dewamê qalîkerdişê xo de dîyar kerde ke dişmin waştêne çîyê înan pîroz desteser bêkero la bi ser nêkewt û wina va: "Ewro rojêke tarîxî yo ke cinîyê êzidî bi xoverdayîşê xo cinî û domanê xo xelisnenê. Ma sipasîyê şerwanê YPJ, YPG û QSDî kenê ke înan cinî û domananê destê DAÎŞî wehşî ra xelisnayî. Dişmin waştêne çîyê ma en pîroz binpê bikero û çin bikero. No semed ra dest eştî herre ma la bi ser nêkewtî. Semedo ke ma sey cinîyê êzidî xo bi fikr û felsafeyê Rayber Apo perwerde kerdo û xo bi rêxistin kerdo."

	 

	'Ez bi ewnîyayîşê kêna xo zaf kêfweş a'

	 

	Maya bi nameyê Xezal Elî, ke maya yew cinîyê ke ameya xelisnayîş a ewnîyayîşê û hîsê xo winî ard ziwan: "Ez ewro zaf kêfweş a ke kêna mi destê DAÎŞî ra xelisyaya û reyna resaya ma. La kîştêke ra zî ez xemgîn a semedo ke keyeyê mi ra hema xeylê kesî destê çeteyê wehşîyan de yê. Ma sipasîyê xo heme kesê ke semedê ma xo ver danê."

	 

	Cinîya ke destê DAÎŞî ra ameya xelisnayîş Bêrîvan Xanime zî wina va: " Ez xeylê kêfxweş a semedo ke ewro ez reyna serê herre xo û keyeyê xo ageyraya. Mi bawer nêkerdêne ke ez rojêke destê DAÎŞî ra xelas bibî. Ez zaf sipasîya embazan kena ke semedo ke ez destê DAÎŞê wehşî ra xelisnayî."

	 

	Dimayê qiseykerdişan cinî û domanê ke ameyî xelisnayîş teslîmê keyeyan ameyî kerdiş.