Cinîyê Kampa Eyn Îsa huzûr û bawerî wazenê 

2017-10-06 16:26:52


	 

	EYN ÎSA - Cinîyê Vakûrê Sûrîye ke Kampa Eyn Îsa de cuyenê dej û elemê ke wextê çeteyê DAÎŞî de vînayê zî Ajansê ma Jinnewsî rê ardî ziwan.

	 

	Kampa Eyn Îsa ke sey bajarê Çadiran yena vînayîş, xeylê koçberan mîyanê xo de hewnena. Reqa ra, Dêrezorê û tay keyeyê ke Iraq ra yê mîyanê xo de hewnena." Cinîyê ke nê bajaran ra koçber bîyê, keyeyê xo ra dûr ameyê vistiş û ende dej û teda çeteyê DAÎŞî ra vînayê. Cinîyan dej û kêfweşîyê xo ardî ziwan.

	 

	'Semedê kêfweşîya xo zêde ez nêeşkena hîsê xo bîyarî ziwan'

	 

	Na çarçewe de cinîya bi nameyê îftîxar Mehmûd Mihemede zî bajarê Dêrazorê ra ya dîyar kerde ke aye semedê kêfweşîya hemleyê xelisnayîşê bajarê xo nêeşkena hîsê xo bîyaro ziwan û wina va: "Ma Dêrazorê ra yê, ma koçber bî û ma domananê xo semedê hêrişê teyeran remnay û ma ameyî Kampa Eyn Îsa. Uca de ters zêde bi, zafê keyeyê ma koçber bî, wêran bî û ma nêzanê ça ra şî."

	 

	Îftîxar wina qiseykerdişê xo dewam kerde: "Hêvîya ma o yo ke Dêrazor xelas bibo û ma ageyrê warê xo. Ez nêeşkena kêfweşîya zêde hîsê xo semedê hemleyê xelisnayîşê bajarê xo bîyarê ziwan."

	 

	'Ez do bi vazdayîş şîrî Reqa'

	 

	Eynî wextî de cinîya bi nameyê Derfe îsmayîle, Bajarê Reqa mojna ra ke aye sond wendo ke do bi rayşîyayîş nê, bi vazdayîş ageyro bajarê xo û wina va: "Ma bi hêvîyê ke Reqa xelas bibo û ma bigeyrê bajarê xo. Tena cîyayîşê tîya de teyare çin ê, kes kesî nêkişeno. Wexto ke ciwanî xelisnayîşê bajarê xo waştênê ke mîyanê refê şerwanan bibê çeteyan înan kiştêne."

	 

	'Kampe de sereyê înan rehet o' 

	 

	Şemse Ibêd Hemeda ke Dêrazorê ra ya kêfweşîya xo yê dûrmendişê DAÎŞî ard ziwan û va: "Halê ma yê Dêrazorê semedê kerdişê çeteyê DAÎŞî baş nêbi. Semedê cilanê ma her teda ro ma rê kerdêne. La wexto ke ma ameyî kampe sereyê ma rehet bi, no semed ra zî ez zaf kêfweş a."

	 

	'Ez zindan de bîya la nika ez azad bîya' 

	 

	Eynî wextî de maya bi nameyê Om Ehmeda ke Reqa ra ya bi zerrîya ke veşnayî boye xo ant û va: "Ma keyeyê xo de ronişte bî la wexto ke Artêşa Azad ame ma wêran bî. Ma her roje cayêke bîn de bî, ma rê cuyayîş nêmendibê."

	 

	'Ma bawerî wazenê'

	 

	En peynî cinîya Iraqîyije ke nêwaşt nameyê xo vajo wina va: "Tena ma wazenê ke ma bi huzûr bicuyê û domanê ma nikyoê mîyanê xeterî. No semed ra ma bawerî wazenê."