‘Hevalanê Nagîhane xeyalanê aye pê anê’ 

2024-12-18 10:26:43


	 

	 

	Memîhan Zeydan-Neslîhan Kardaş 

	 

	WAN - Jîneolojî ra Eylem Akti derheqê “Merkezê Cigêrayîş û Kitabxaneyê Berardişê Cinîyan” ke şaredarîya bajarê pîlî ya Wanî akerd de qisey kerd û vat: “No dewamê kitabxaneyê ke hevalanê Nagîhan Akarsel ke Silêmanîye de akerdibî yo. Ma sey taqîbkerdoxê Sîmone û Nagîhane xeyalanê aye pê bîyarê.”

	 

	Şaredarîya Bajarê Pîlî ya Wanî 7ê kanûne de qezaya Tuşba taxa Akkopru ya ‘Merkezê Cigêrayîş û Kitabxaneyê Berardişê Cinîyan’ akerd. Kitabxaneyo ke xeyalê endama Merkezê Cigêrayîşê Jîneolojîye Nagîhan Akarsel ke 4ê teşrîna verêne 2022ine de ameye qetilkerdil bî, badê Silêmanîye, Wan de zî ame akerdiş.

	 

	Xebatkara Kovara Jîneolojîye Eylem Akti derheqê amanc û îmkananê merkezî de qisey kerd.

	 

	‘Lazimî ser o ame akerdiş’

	 

	Eylem Akti da zanayîş badê ke şaredarî kewta binê îdareyê DEM Partîye, xebatê cinî û tutan esas gênê û vat: “Goreyê lazimî û pêşnîyazîyê şarî proje kewenê cuye. ‘Merkezê Cigêrayîş û Kitabxaneyê Berardişê Cinîyan’ lazimîyan ser o ame akerdiş. No ware semedê hevalanê cinîyan ame akerdiş. Eynî wextî de nameyêk sey pawitişê cewherî yê hemverê zîhnîyetê serdestî ameyo akerdiş.”

	 

	Her wareyî ra kitabî est ê

	 

	Eylem Akti bale ant prosesê awankerdişî ser o û vat: “Pêşnîyazîyê hevalan ser o û lîsteyê ke hevalan awan kerdebî, kitabî ameyî weçînayîş. Kitabî bi paştdayîşê nuştoxanê cinîyan ardî merkez. Kitabê nika kitabxane de tena beşêk awan kenê. Hema kitabê ke bêrê zaf zêde yê. Lîste û pêşnîyazî hema yenê. Her wareyî ra kitabî est ê.”

	 

	‘Ma do xeyalanê Sîmone û Nagîhane pê bîyarê’

	 

	Eylem Akti tewr peyîn wina vat: “Kitabxaneyê cinîyan badê qetilkerdişê Nagîhane, Silêmanîye de ame akerdiş. No hetê tarîxê cinîyan de muhîm o. O yo ke tîya ameyo akerdiş zî dewamê Silêmanîye yo. Ma Nagîhane û hevalanê xo yê bînan xo vîr ra nêkenê. Ma do xeyalanê înan her wext pê bîyarê. Do kitabxane Wan de hişmendîyêk awan bikero. Sewbîna do projeyê derheqê cinîyan de zî dewam bikerê. Ganî ma hişmendîyê muhîmî yê sazgehanê xoseran ê cinîyan de bibê.”