Seba mîtîngê 13ê Teşrîna Verêne vengdayîş: Ganî tecrîd bêro vînayîş  

2024-10-01 10:38:07


	 

	 

	Gulîstan Gulmuş

	 

	AMED - Endamê DEM Partîye seba mîtîngê 13ê teşrîna verêne ya Amedî ke seba azadîya fîzîkî ya Rayberê PKKyî Abdullah Ocalan do bêro kerdiş, vatî: "Ganî ma serê rayîrê azadîya Birêz Abdullah Ocalanî de pîya têbigêrê."

	 

	Pêwa ke 3 serrî û 7 aşmî derbaz bî zî Rayberê PKKyî Abdullah Ocalanî ra tu agahî çin a. Abdullah Ocalan ke tewr peyîn 7ê Tebaxa 2019ine de bi avûkatanê xo dir û 3ê Adara 2021ine de zî keyeyê xo dir rî bi rî pêvînayîş kerd, 25ê Adara 2021ine de zî birayê xo Mehmet Ocalanî dir tenê bi telefon qisey kerd. Pêro muracatê ke ameyî kerdiş, bêcewab mendî.

	 

	Parlamentera Partîya Têduştî û Demokrasî (DEM Partî) Adalet Kaya û Endama Meclîsê Partî ya DEM Partî Hulya Ateş Koç derheqê mîtîngê pîlî ê 13ê Teşrîna Verêne ke do bêro organîzekerdiş, qisey kerdî.

	 

	'Her keso/a ke tecrîd hîs keno ganî tewrê mîtîngî bibo'

	 

	Endama PMyî ya DEM Partîye Hulya Ateş venga mîtîngê 13ê teşrîna verêne kerd û wina vat: “Xeylêk muhîmo ke pêro kesê bindest, ciwan, cinî, tutî, pêro kesê ke tecrîd hîs kenê, uca de bê û seba bieşkê vengê xo berz bikerê, mîtîngê azadî de ca bigîrê. Ma muhîmîyêk pîl danê nê mîtîngî û ma a bawerî de yê ke do xebate bi hawayêkê baş, bi plan, bi fedakarî û disiplînêk pîl bêro kerdiş.

	 

	'Ma bi rêxistinbîyayîşê xo bawer ê'

	 

	Hulya dewam de wina vat: “12ê êlule de Amed û Stenbol de eşkerayîyê ma yê hemdem ameyî weşanayîş. Bi eşkerayîye mîtîngê ma yê 13ê teşrîna verêne zî ame îlankerdiş. Venga ma oyo ke her çar hetê Tirkîya ra heta Amed rayîrşîyayîş bêro kerdiş.  Ma zêdeyêr hêzê xo ra bawer ê. Ma mîyanê çerxêk pîlî de yê, çiqas şino ma yenê pelçiqnayîş. La ma bi rêxistinbîyayîşê xo bawer ê. Ma zanê ke bêrêxistin azadî mumkin nîya. Coka ma zanê ke tu hêz nêeşkeno rayîr vernîya kesê rêxistinkerde bigîro. Seke cinî ma zanê ke ma do hemverê şerê lêşînî sere nêtewênê û ma do bi xoverdayîşê xo yê cewherî cewab bidê."

	 

	'Ma Birêz Abdullah Ocalan sey muzakerewanê sereyîn vînenê'

	 

	Parlamentera  DEM Partî Adalet Kaya zî bale ant serê komployê 9ê Teşrîna Verêne. Adalete wina qal kerd: "Ma nê mîtîngî sey lingê hemleyî organîze kenê. 'Azadî Birêz Abdullah Ocalanî rê, çareserî meselaya kurdî rê' û ma vanê ganî 9ê Teşrîna Verêne û nata hemverê nê sîstemê darbeker û komploger her wareyê cuye de nêrazîbîyayîşê xo vajê. Semedo ke sere de zîndanê Îmrali ganî rewşa bêserûber û nêbîyayîşê pêvînayîşî û tecrîd peynî bibo. Ganî no tecrîdê serê birêz Ocalanî bêro wedaritiş û seba azadîya ey game bêro eştiş. Semedo ke ma vanê Birêz Ocalan tenê Tirkîya de nê, Rojhelatê Mîyanên de zî eşkeno no şero ke zêde beno vindarno. Lazim o êdî no tecrîd peynî bibo."

	 

	'Azadîya Ocalanî yena manaya azadîya şaran'

	 

	Adalete dewam de wina vat: "Şer, polîtîkaya şîdetî, feqîrî, îstismarkerdişê tutan, kiştişê cinîyan, merdişê karkeran û kiştişê ke yenê kerdiş, seba polîtîkayê dewlete yê. Bi na polîtîkaya tecrîdî bi desan serrî yo seba komelî sîstemêk awan kerdî. Îqtîdaro faşîst zî plan keno ke nê çî dewam bikero û mende bikero. Her cayê ke cuye û mekan bibo ganî ma îtîrazê xo yê hemverê tecrîdî her wareyê cuye de bi rêxistin bikerê. Seba nê armancê ma yê kombîyayîşê mîtîngî de oyo ke ma venga rayaumûmî yê mîyanneteweyî, rayaumumî yê Tirkîya, rêxistinê sivîl û partîyê sîyasî bikerê. Ganî no problem bêro vînayîş. Azadîya birêz Ocalanî yena manaya azadîya şaranê Tirkîya. Seba nê zî ganî ma israrê xo yê azadîye pîlêr bikerê."