‘Tecrîd problemê her kesî yo’

2024-09-24 09:43:10


	 

	Pelşîn Çetînkaya

	 

	AMED – Hemsereka DBPyî ya Amedî Sultan Yaray, bale ant polîtîkayanê tecrîdî yê îqtîdarî ser o û vat: "Tecrîd problemê her kesî yo û ganî her kes pîya hemverê tecrîdî de têkoşîn bikero.

	 

	Rayberê PKKyî Abdullah Ocalan Zîndanê Tîpê Fyî yê Asayîşê Berzî yê Îmraliyî de mîyanê şert û mercê giranî yê tecrîdî de yeno tepiştiş û 43 aşmî yo tu zanayîş ey ra nîno girewtiş. Heqê pêvînayîşî yê Abdullah Ocalan ê keye û avûkatanê xo dir bi sebebê “cezaya disiplînî” yeno astengkerdiş. Sebebê nê  cezayanê dîsiplînan û numarayanê dosyayan pêwa pêro muracatan û îtîrazan avûkatan dir nîno parekerdiş. 

	 

	12yê êlule de Amed de bi sloganê "Hemverê komployî de xo ver danê, seba azadîye Amed de kom benê" startê kampanyaye ame dayîş. 13ê teşrîna verêne de zî do Amed de bi mîtîng kampanya bêro peynîkerdiş. Derheqê tecrîd û xebatê ke bêrê kerdiş de hemsereka Partîya Herêmê Demokratîke (DBP) ê Amedî Sultan Yaray ajansê ma rê qisey kerd.

	 

	'Nêzdîbîyayîşêk keyfî est o'

	 

	Sultane, destpêk de bale ant serê tecrîdî û wina vat: "43 aşmî yo agahî nîna girewtiş. Agahî nêgirewtiş yena manaya dewamîyê komployî. Tirkîya de her kes avûkat û keyeyê xo dir pêvînayîş keno û heqêk wina est o. Labelê hemverê Abdullah Ocalanî de tecrîdêk mutlak est o. Ne Abdullah Ocalan dir ne zî hevalanê ey dir avûkatî û keyeyî nêeşkenê pêvînayîş bikerê. No çî nîno qebûlkerdiş. No nêzdîbîyayîşêk keyfî yo.”

	 

	Tesîrê polîtîkayê tecrîdî

	 

	Sultane dewam de wina vat: "Şîdeto ke zêde beno, girêdayeyê polîtîkayê tecrîdî yo. Eke tecrîd wurzo, do mîyanê şarî de yewîye bibo. Çîyê ke Tirkîya de qewimyenê bingehê xo tecrîd ra gênê. Hêrişê hemverê cinîyan, bêhevîbîyayîşê ciwanan, tîryakî û ûsn. Heta ke tecrîd nêro wedaritiş û Birêz Ocalan azad nêbo Tirkîya de îstîkrar pê nîno û do şar bêhêvî biciwîyo, ekonomîyêk adilane pê nîno."

	 

	'Do heta key tecrîd dewam bikero?'

	 

	Sultane qiseykerdişê xo wina qedêna: "Gelo do tecrîd heta key dewam bikero? Adresê çareserî Îmralî yo û Abdullah Ocalan o. Tirkîya de kesê ke aştî wazenê, eşkenê tecrîd peynî bikerê. Tecrîd tenê babeta şarê kurdî nîyo, babeta pêro şarê ke Tirkîya de ciwîyenî yo. Ganî ma pîya peynîya tecrîdî bîyarê.  Heta nika xeylêk çalakî û bername ameyî organîzekerdiş. Ez reyke bîn veng dana û vana ke bêrê ma pîya zorê tecrîdo bîyaye berê.”