Seba tewrbîyayîşê panelê ‘Şer, feqîrî û çareserîya demokratîke’ vengdayîş

2024-09-05 10:24:47


	 

	 

	 

	STENBOL- Hemsereka DEM partîye ya Stenbolî Gonca Yangoz bi vatişê sey ‘Ma pêro şarê xo yê ke cuyêka hempar, aştîyane, demokatîk wazenê dawetê panelê ‘şer, feqîr û çareserîye demokratîke’ kenê.

	 

	Partîya Têduştî û Demokrasî (DEM Partî ) yê Stenbolî do 8ê êlule de Merkezê Kulturê Cemîl Candaşî yê Şîşliyî de saete 11.30-18.00ine de bi sernameyê ‘şer, feqîr û çareserîya demokratîke’, panel organîze bikero. Panel do bi di roniştişî pê bêro û moderatorîya panelî do sereka şubeyê ÎHDyî Stenbolî Gulseren Yolerî bikero. Avûkatanê Rêberê PKKyî Abdullah Ocalan û Buroyê Huqûqî yê Asrine ra, Raziye Ozturk, serekê Weqfa Aştî ra Hakan Tahmaz, Serekê Pêroyî yê Komeleya Kulturê Pîr Sultan Abdal (PSAKD) Cuma Erçe, nuştoxe Ayşegul Devecîoglu û nuştox-rojnameger Ercument Akdenîz do sey panelîst ca bigîrê. Hemsereka DEM Partî ya Stenbolî Gonca Yangoz, derheqê şikinayîşê tecrîdî û pêameyîşê azadîya fîzîkî de ercnayîş kerd û şarî dawetê panelî kerd.

	 

	‘Seba çareserîya problemî adres dîyar o’

	 

	Gonca wina qal kerd: “Ma mîyanê xelekê şerî ke çareser nêbeno de yê. Şero ke Kurdistan de yeno ciwîyayîş, dewamêk ci est o. Tirkîya hêrîşê her hetî kena. La çareserîya nê bi aştî mumkin a. Yanî bi şikinayîşê tecrîdî, bi pêvînayîşê muxataban dir mumkin o. Adresê çareserî dîyar o. Çareserî Abdullah Ocalan o. Çareserî Îmrali yo. Seba nê ma lazimî bi panel vîna. Ma nika amadekarîya ci kenê. Tesîrê tecrîdî şarê Kurdistanî ser o û Tirkîya de zî est o. Polîtîkaya tecrîdî dir, polîtîkaya şer û feqîrî ana û dişminîya mabêne şaran de zêde kena, faşîzmî mende kena."

	 

	‘Heta Abdullah Ocalan azad nêbo do şer peynî nêbo’

	 

	Gonca dewam de wina vat: “Sîstemo ke tu cayê dinya de çin o, Îmrali de pê yeno. Keye û avûkatî nêeşkenê pêvînayîş bikerê, agahîyêke ci ra nîna girewtiş. Na rewşe hêzê ma yê çareserîya problemê kurdî de çin kena. Abdullah Ocalanî vat, ez mesela hewteyêk de çareser kena. Heta ke azadîya fîzîkî ya Abdullah Ocalanî pê nêro, şer zî peynî nêbeno. Heta aştî nêro, feqîrî û faşîzm zî do dewam bikero. Ma wazenê cinî nêrê qetilkerdiş, heywanî nêrê qetilkerdiş û tecrîd bêro wedaritiş.”

	 

	Seba tewrbîyayîşê panelî vengdayîş

	 

	Gonca tewr peyîn venga pêro kesî kerd û vat: “Xebatê ma do pey panelî dewam bikerê. 8ê êlule de Merkezê Kulturê Cemîl Candaşî yê Şîşli de saete 11.30-18.00ine de do panelê ma bêro kerdiş. Ma her kesî dawetê panelê xo kenê.”