Amancê ‘Wendişê Azadîye’ vurnayîşê zîhnî yo

2024-09-04 10:29:15


	 

	 

	 

	STENBOL - Aktîvîsta TJAyî Dîdem Nur Acabey, "Wendişê Azadîye" yê ke ameyê kerdiş, sey yew hamleyê vurnayîşê zîhnîyetî name kerd û vat: "Wexto ke ma têkoşîn hîra bikerê, ma do vurnayîşê zîhnîyetî bikerê."

	 

	Têgêrayîşê Cinîyanê Kurdan roja ke vejîyayo werte,  heta nika bi metodê tewir tewir seba vurnayîşê zîhnîyeta ke hedef keno, bi serran o têkoşîn keno. Têgêrayîşê Cinîyanê Azadan (TJA) zî çarçewaya kampanyaya “Abdullah Ocalan rê Azadî, problemê kurdî rê çareserîya siyasî” ke teşrîna verêne 2023ine de amebî destpêkerdiş, bi “Wendişê Azadîye” seba nê gaman erzena. Atolyeyê ke xeylêk qezayanê  Stenbolî de ameyî organîzekerdiş de, beşê kitabê Rayberê PKKyî Abdullah Ocalanî û ercnayîşê ci ameyî wendiş û munaqeşeyî ameyî kerdiş. Aktîvîsta TJAyî Dîdem Nur Acabey derheqê atolyeyê ke organîze kerd de ercnayîş kerd.

	 

	Atolyeyan de ganî merdim senî biciwîyo? Ame munaqeşekerdiş

	 

	Dîdema ke bi yadkerdişê Dayîka Zerge ya ke Kobanê de hemverê DAIŞî xo ver dabî û bî sembola xoverdayîşî û tewr peyîn dinyaya xo bedelnaye, dest bi qiseykerdişî kerd û vat: "Nê çalakî zî hetê şarî ra bi hawayêkê pozîtîf ameyî pêşwazîkerdiş. Çarçewaya kampanya de xeylêk çalakî ameyî organîzekerdiş. Modernîteyê kapîtalîst bi polîtîkayê ke Rojhelatê Mîyanên awan kerdo, cuyêka bohem û bêerc dano şaran. Seba bêasayîş, bêbawerî û bêameyoxî ke hewl yeno dayîş mîyanê komelî de bêro awankerdiş, ruhê komelî esîr ameyo girewtiş. Ganî ma pîya hemverê polîtîkayê tecrîdî yê pêroyî de têkoşîn bikerê. Ganî hemverê qetlîamê gane û xoza têkoşîn bikerê. Ma dî ke vera ke pîya serê senînê şerî munaqeşe bikerê, astengî vernîya caardişê ci est o. Coka muhîm o ke ma bi nê munaqeşeyan fikrê cuya ekolojîk, demokratîk, azadîya cinîya birêz Ocalanî bikerê merîyet."

	 

	'Ganî zîhnîyetê modernîteyê demokratîke pê bêro'

	 

	Dîdeme bale ant serê muhîmîyê paradîgmaya ke Rayberê PKKyî Abdullah Ocalanî pêşkêşê şarî kerdo û vat: “Modernîteyê demokratîke ercê cuya komunal o. Komxebatan de ma xoverdayîşê hemverê modernîteyê kapîtalîst ser o û senîn ma eşkenê pîya cuyêka newe awan bikerê munaqeşe kenê. 5 hezar serrî yo pratîkê cuya dewlete est o.  Na dewlete bi hêrişê serê ercê merdimayî yê tarîxî, hewl dana xo sey yewin heqîqet bimojno. Wexto ke vurnayîşêk zîhnî nêbo, pratîkê ma tenê xoverdayîşî reyde sînordar manenê. Zaf muhîm o ke merdim vajo ez na cuye qebûl nêkena, la seba ganî ez senîn ciwîyena têkoşîn bikero. Wexto ke ma têkoşîn hîra bikerê, ma do biresê vurnayîşê zîhnîyetî."

	 

	'Atolyeyê ma do dewam bikerê’

	 

	Dîdeme tewr peyîn wina vat: “Wendişê azadîye xebatêke zaf bi qîmet o ke merdim na xebate bi resenîyê cinî bikero. Rêxistinbîyayîşê cinî, eynî wextî de rêxistinbîyayîşê cuye yo. Eke na komel bivurnê, ma eşkenê vurnayîşê zîhnîyetî ca bîyarê. Coka ma wareyê cuya azad û ercê cuya komunal pîya munaqeşe bikerê û pîya bikerê merîyet. Nika ra tepîya do xebatê ma yê serê babetê cîya de kîşte Meclîsê Cinîyan ê DBPyî û Meclîsê Cinîyan ê DEM Partî dewam bikerê."