Pêvînayîşê ‘Nan û Edalet’ dewam kenê: Bi qasê nanî edalet zî muhîm o

2024-08-31 11:29:11


	 

	Nazlican Nûjîn Yildiz

	 

	ÎZMÎR - Çarçewaya kampanya ‘Nan û Edelet’ ke DEM Partî keno, pêvînayîşî pê yenê. Hemsereka DEM Partîye ya Îzmîrî Vezan Karabulut derheqê pêvînayîşan de qisey kerd û vat, na kampanya hemverê feqîrî û bêedaletî seba çareserî yena kerdiş. Vezane vat ke hemverê problemê pêameyîşê yewîye xeylêk muhîm o.

	 

	Partîya Têduştî û Demokrasî (DEM Partî) hemverê krîzê ekonomî û feqîrî her ke şino zêde beno de 19ê Temmuze de Qoser de mîtîngê ramitişî reyde startê kampanyaya ‘nan û edeletî’ da. Çarçewaya kampanyaya de xeylêk bajaran de pêvînayîşî dewam kenê. Îzmîr û Manîsa de pêvînayîşê ke ameyî kerdiş de karker, kedkar û pawitoxê xoza reyde pêvînayîşî ameyî kerdiş. Hemsereka DEM Partî ya Îzmîrî Vezan Karabulut derheqê nê pêvînayîşan de qisey kerd û vat, seba feqîrî û bêedaletî rê çareserî bivînê nê pêvînayîşan pê anê û hemverê probleman zî ganî bi yewîye têbigêrê.

	 

	'Qasî nanî edelet zî muhîm o'

	 

	Vezane wina dîyar kerd: “AKP krîzê xo yê kapîtalîst şarê feqîrî ser o bar keno û hewl dano wina çareser bikero. Bi zêdekerdişê feqîrî wazeno nê krîzî ra vejîyo. No serê keyeyê feqîran de bîyo barêk pîl. Şar nêeşkeno xo biresno xidayê cuye. Xoresnayîş bîyo problemêk pîl. Ma pêro zanê ke edelat zî bi qasê nanî nê welatî rê lazim o. Komelêk ke edelet çinîbo de bawerî zî çin a.”

	 

	 

	'Şertê karkerê ramitişî zehmet ê'

	 

	Vezane vat ke hemsereka pêroyî ya DEM Partîye Tulay Hatîmogullari çarçewaya kampanyaya ‘nan û edeletî’ de Manîsa de karkerê ramitişî reyde ameya têhet û vat, şert û mercê karkerê ramitişî yê kurdan qet baş nîyê. Vezane vat, înan şahidîya rewşa karkeranê kurdan kerda û babeta starbîyayîşî de probleman ciwîyenê.

	 

	Pîya awankerdişê çareserî

	 

	Vezane tewr peyîn wina vat: “Ma sey DEM partî wazenê nê probleman rê çareserî bivînê. Komîsyon zî ameyê awankerdiş. Nimûne ma derheqê şewatan de komîsyon awan kerd. Do komîsyonanî reyde lazimîyê şarî bîyarê meclîsan. Ma zî bajaran de xebatanê înan bikerê û ma do paştdayîş bidê ke bi vengêk berz nê problemî bîyarê ziwan.”