Bi ‘Heyetê Ercnayîşî yê Huqûqê Keyeyî’ cinî hedef yenê girewtiş

2024-08-28 10:06:59


	 

	Rozerîn Gultekin

	 

	STENBOL - Zerrîwaza EŞÎKî Ozgul Kaptan ‘Heyetê Ercnayîşî yê Huqûqê Keyeyî’ ke hemverê cinîyan de ameyo awankerdiş ercna û vat: “Bi nê wazenê cuya cinîyan bikerê binê kontrolî. Hemverê nê de xoverdayîşêk cidî lazim o.”

	 

	Wezîrê Edaletî Yilmaz Tunç rojê vîyarte de eşkerayîyêke da û eşkerayîye de vat, ‘Heyetê Ercnayîşê Huqûqê Keyeyî’ awan kerdê. Wezareta Xizmetê Keye û Komelî aşma Gulane de ‘Planê Çalakî û Belgeyê Vîzyonê Xurtkerdiş û Pawitişê Keyeyî’ weşan kerdebî. No heyet ameyo awankerdiş zî sey  mekanîzmayêk ke nê wezîfeyan bikerê yeno ercnayîş. Zerrîwaza Seba Têduştîya Platformê Cinîyan (EŞÎK) Ozgul Kaptan, derheqê nê de ercnayîş kerd.

	 

	‘Heyetê ercnayîşî nîyo, heyetê xapênayîşî yo’

	 

	Ozgule wina vat: “Hukmê Qanûnê Dadgeha Desturê bingehîn de bi qerarnameyê awankerdişê nê heyetan amebî betalkerdiş. Verê zî vatî huqûqê keyeyî do newe ra bêro awankerdiş. Do prosesê Wezîrê Edaletî bi nameyê Heyetê Zanistî heyetêk awan kerd. Nika zî çîyêk cîya yeno vatiş la çîyo ke yeno waştiş bêro kerdiş eynî çî yo. Bi nê heyetan wazenê cuya cinîyan bikerê binê kontrolî. Wazenê babeta keyeyî bikerê vernîya heqê cinîyan. Yê ke wazenê bipawê keye nîyo, wazenê nîyetê xo yê rayîr ver bi Talîbanbîyayîşî bikerê cuye. No heyet esas de heyetêk topyekun xapênok o.”

	 

	‘Wazenê fikrê têduştî werte ra wedarnê’

	 

	Ozgule babeta awanbîyayîşê têduştî de bi qerardayîşî qal kerd û vat: “Marayê miftî, qanûnê medenî de rayîr ameyo akerdiş. Demê ci de seba reaksîyonê baş hemverê çinbîyayîş vernîya mudaxaleyê bînî ameyî akerdiş. Bi nê wazenê fikrê têduştî yê hişê komelî de werte ra wedarnê."

	 

	‘Xoverdayîşêk cidî lazim o’

	 

	Ozgule vat heyetê ameyo awankerdiş de rêxistinê cinîyan, femînîstî çin ê û wina qedêna: “Seba nê tenê têkoşînê rêxistinê cinîyan qîm nêkeno. Ganî xoverdayîşêk zaf cidî bêro mojnayîş. Ganî ma hemverê nê de heyetê hêzê xo bikerê yew. Ma sey EŞÎKî ma do rîyê rast yê nê heyetî bimojnê. Ma do seba nê bixebitîyê. Ma do seba feydeyê komelî nê vajê.”