‘Qîm nêkeno la ma mecbûr ê’

2024-08-27 09:10:22


	 

	 

	WAN - Cinîyê sey karkerê mewsîmî Westan de mîyanê erdan de binê germî de xebîtyenê, seba zimistanî debara xo bikerê, hamnanî kede danê. Cinî giranbîyayîşê krîzê ekonomî reyde seba debare tay şenik bikerê xebityenê û wina vatî: “Qîm nêkeno la ma mecbûr ê bixebitîyê.”

	 

	Wan de ameyîşê hamnanî reyde karkerê mewsîmî yê cinî mîyanê erdan de xebityenê. Westanê Wanî de cinî mîyanê erdê fêkî û sebze de xebityenê û pê debara xo kenê. Cinî seba karî her serê sibayî merkezê Wanî de saeta 05.00 de şinê Westan û 7ine de dest bi kar kenê, heta 18.00ine binê tîjî de xebityenê. Mîyanê erdêk de hûmara xebatkarê cinîyan 15-20 a. Cinîyê seranserê roje de xebityenê, rojaneyê înan yeno 600 TL.

	 

	Cinîyan dîyar kerd ke hema hema pêroyê xo, bi serran o nê karî kenê û mêrdeyê înan zî înşatan de xebityenê. Her emrî de cinî seba debara keyeyî mîyanê erdan de kedêke pîl danê. Cinîyê ke tornê înan est ê zî û yê 16 serrî zî est ê. Xeylê cinîyan dîyar kerdî ke tutê înan yê şinê mekteb est ê û semedo ke debare zehmet bîya mecbûr ê yenê mîyanê erdan xebityenê. Cinîyan dîyar kerd ke her serre hîrê aşman heta aşma êlule baxçeyan de şuxilênê.

	 

	Cinîyan dîyar kerd zimistanî kar çin o û hamnanî şuxilênê. Cinîyan dîyar kerd ke fabrîqeyan meaşê cinîyan nîno dayîş û seba înan karo tewr baş mîyanê baxçeyan de xebate ya.

	 

	Cinîyan da zanayîş ke baxçeyan de fasule, îsot, bacan, firingî, zebeş û petêxî yenê ramitiş û na aşme de fasuleyan arê danê. Cinîyan vatî ke demê bêro de do firingî biresê û dimayê arêdayîşê înan do pereyê qezenc kenê hewl bidê pê debara xo ya serrêke bikerê.