Meclîsê Cinîyan ê SESî ra seba cinîyan atolye 

2024-08-21 10:21:24


	 

	 

	Oznur Deger

	 

	MÊRDÎN - Meclîsê Cinîyan ê SESî yê Mêrdînî, Şaredarîya Bajarê Pîlî reyde derheqê xoresnayîşê heqê weşîye yê cinîyan de taxan de xebata atolye da destpêkerdiş. Sekretera Cinîyan a SESî ya Mêrdînî Sultan Ayyildiz derheqê xebate de qisey kerd û vat: “Ma wazenê ke xo biresnê cinîyê ke nêeşkenê keye ra vejîyê û dewan de ciwîyenê.”

	 

	Cinîyê SESî dewa Goliyî de mekteb de cinîyan reyde ameyî têhet, bi kurdkî perwerdeyê weşîye dayî. Cinîyanê SESî derheqê xoresnayîşê heqê xizmetê weşîye û xo nêweşîyan ra pawitişî de agahî dayî. Cinîyê SESî derheqê kontrolê rutîn yê memikan ke keye de eşkenê senîn bikerê zî perwerde dayî. Sewbîna derheqê metodê dermankerdiş û xoresnayîşê heqê weşîye de broşur ameyî vilakerdiş.

	 

	Sekretera Cinîyan a SESî ya Mêrdînî Sultan Ayyildiz ke tewrê atolyeya perwerdeyî bî, atolye û amancê ci qal kerd.

	 

	Sultane da zanayîş ke ê seke SESî tenê sendîkaya kedkaran nê, sendîkaya şarî yê zî û sey meclîsê cinîyan ê SESî weşîya cinî esas gênê û wina vat: “Ma na çarçewa de şaredarîya pîlî reyde xebatêke hempar da destpêkerdiş. Roja ewilî ya xebate de ma dewa Goliyî de cinîyan reyde ameyî têhet. Perwerde xeylêk baş derbaz bî. Ma babetê xoresnayîşê heqê weşîye de, dermankerdişî de, mercîyê ke eşkenê muracat bikerê, metodê dermankerdişî de agahî da.”

	 

	Sultane wina dewam kerd: “Amancê ma oyo ke ma xo biresnê cinîyê ke nêeşkenê xo biresnê xizmetê weşîye. Goreyê hewcedarî ma nameyê dewan dîyar kenê. Amancê ma oyo ma xo biresnê herêmê ke vurnayîşê înan zehmet o. Ma wazenê xo biresnê cinîyê ke nêeşkenê xo biresnê xizmetê weşîye.”