‘Ganî pêro kesî kitabê Rayberî biwanê û nas bikerê’  

2024-08-13 10:41:35


	 

	 

	Mîdye Miqted

	 

	ŞEHBA - Cinîyê ke tewrê çalakîya wendişê kitabê Rayberê PKKyî Abdullah Ocalanî bîyî, dayî zanayîş ke fikr û fehmê Abdullah Ocalanî seba ke her cayî de vila bibo, çalakîyê bi nê rengî xeylêk muhîm ê û vatî: "Ganî pêro kesî kitabê Rayberî biwanê û nas bikerê."

	 

	Kantonê Efrîn-Şehbayî de reya diyîne yo ke bi kombîyayîşê hûmarêke pîl bi çarçewaya hemleyê "Abdullah Ocalanî rê azadî problemê kurdî rê çareserîya siyasî" xeylêk welatijî kitabê Rayberê PKKyî Abdullah Ocalanî yenê wendiş. Na rey zî bi tewrbîyayîş xeylêk kesî çalakîya wendişê kitabê Abdullah Ocalanî ameyî organîzekerdiş. Na çalakî parkê 4ê Nîsane yê girêdayeyê qezaya Ehdasî de ame orgenîzekerdiş. Kitabê Abdullah Ocalanî pawitişnameyê 5 bi ziwanê kurdkî û erebkî ame wendiş. 

	 

	'Seba Rayberî ma do çalakîyan organîze bikerê'

	 

	Gulê Cafer da zanayîş ke seba tecrîd wurzo ê do  her tim xebatanê xo dewam bikerê û wina vat: "Ma zî bi têkoşîn û xebata xo bi çalakîyanê xo tewrê hemleyê 'Abdullah Ocalanî rê azadî problemê kurdî rê çareserîya siyasî' bîyî. Xora no hemle zî serrêke de xeylêk cayê dinya de ame organîzekerdiş. Kîşte ci û binê nameyê nê hemleyî de xeylêk kesî vengê xo berz kenê û seba azadîya Rayberî mîyanê çalakîyan de yê."

	 

	'3 serrî to tu zanayîş Rayberê ma ra nîno girewtiş'

	 

	Gulê dewam de wina vat: "26 serrî yo ke Rayberê ma mîyanê girawa Îmraliyî de ameyo tepiştiş û eynî wextî de hîrê serrî yo tu xebere ci ra nîna girewtiş. Ma zî sey şarê Efrînî bi şîdet nê tecrîdê girankerde yê ke serê Rayber Abdullah Ocalanî de ameyo ferzkerdiş şermezar kenê. Sewbîna bi rayîrê organîzekerdişê çalakîyê xo ma nêrazîbîyayîşê xo mojnenê ra.”

	 

	'Ganî cinî tewr zêde para xo nê felsefeyî ra bigîrê'

	 

	Dewamê qiseykerdişê xo de Hejere da zanayîş ke çîyo tewr sereyîn ganî cayê xo nê felsefeyî de bigîro cinî ya û wina vat: "Seba ke cinî pêro welat û netewan de her şîdetî vînenê û zîhnîyetê serwer ê camêrdî ke teda kerdo, coka tewr zêde ganî para xo fikr û fesefeyê Rayberî ra bigîro cinî ya. Ganî cinî ne tenê kar û barê keyê wedarno milê xo ser, ganî cinî her wareyî de çalak bê."

	 

	'Ganî pêro kes kitabê Rayberî biwanê û nas bikerê'

	 

	Hejere tewr peyîn wina vat: "Ewro dinya çimê xo ma rê pada ya. Coka ganî ma wayîrê xo û fikr û felsefeyê Rayberê xo vejîyê. Ganî ma xo bisepernê fikr û felsefeyê Rayberê Şarê Kurdî Abdullah Ocalanî. Seba nê vengdayîşê ma yo yewin û yê peyîn oyo ke pêro kesî kitabê Rayberî biwanê, nas bikerê û pratîk de pê bîyarê.”