Elkê de dewî binê ablûqa de yê 

2024-08-05 13:53:38


	 

	 

	ŞIRNEX - Qedexeyê ke dimayê operasyonê leşkerî 3 dewanê Elkê de dest pêkerd, dewam keno. Xêrcê roniştoxê dewan, kes nêeşkeno şêro dewan.

	 

	Dimayê operasyonê leşkerî yê 21ê hezîrane dewa Hemka, Pîrosa û Melesa yê serê qezaya Elkê ya Şirnexî de ame destpêkerdiş, bejayîyê dewe de şer vejîyabî û dimayê şer û pêrodayîşan herême hetê teyarenê şerî ra amebî bombavarankerdiş. Netîceyê bombavaranî de 4 endamê HPGyî Basrî Cîn, Sefer Temel (Rûstem Çekdar Kato), Yilmaz Sala (Kamuran Gever) û Arvîn Huseynî (Dilsoz Rojhilat) dinyaya xo bedelnabî.

	 

	Ablûqa dewam keno

	 

	Ablûqayê leşkeran ê serê hîrê dewan dewam keno. Dekewtişê dewan de noqteyê leşkerî ameyî dayîş, dewijê ke kewenê dewe bi cigêrayîşê rayîrî rî bi rî manenê. Xêrcê roniştoxan dekewtiş û vejîyayîş her kesî rê ameyo qedexekerdiş.