Curnê Reşî de dimayê 47 serrî xebatî newe ra dest pêkenê 

2024-08-03 10:56:19


	 

	 

	Şehrîban Aslan

	 

	RIHA - Şaredarîya Curnê Reşî ya ke dimayê 47 serran DEM Partî bi dest kerd, semedê xizmet şarî rê bêro kerdiş, her çî newe ra dest pêkeno. Hemşaredare Xerîb Yeşîl dîyar kerd ke butçeyê şaredarî kerdê bin û vat, warê xizmetî de zehmetîyê pîlî est ê, la semedê xizmet şarî rê bikerê do her çî bikerê.

	 

	Prosesê îtîrazî yê dimayê weçînayîşê herêmî yê 31ê Adare de, YSKyî qerarê newekerdişê weçînayîşî da û Şaredarîya Curnê Reş ke 27 hezar û 686 weçînîtoxî rayî şuxilnayî, hetê Partîya Têduştî û Demokrasî (DEM Partî) ra ame bidestkerdiş û Xerîb Yeşîl û Serhan Paydaş bîyî hemşaredar. Rîyê şaredarîya ke kewt binê îdareyê DEM Patî, bi wedaritişê dêsê burokrasî yê mabêne şar û îdarekarî de vejîya werte. Yew çîyê ke şaredarî de ewil bale antî nê bî ke her kes bi rehetî kewt zereyê şaredarî û roja destpêkî ra heta ewro hemşaredarê şaredarî reyde pêvînayîş kerd.

	 

	Hemşaredare Xerîb Yeşîl, nêzdîbîyayîşê şarî yê roja ewil û heta nika û xebatê xo qal kerd.

	 

	

	'Ma do newe ra dest pêbikerê'

	 

	Xerîbe wina qal kerd: “Ma wazenê raşteyê kar û raşteyê bînî cinîyan rê abikerê. Ma wazenê serê kulturî de cigêrayîş bikerê la ma nêeşkenê bikerê, xeylê deynî mendê. Ma wareyê ekonomî de xeylê zehmetî ancenê. Do demêk wina dewam bikero.  Helbet do xeylê projeyê ma bibê. Di sazgehê cinîyan est ê, la çend kompîtur uca de ameyê ronayîş, çend makîneyê deştişî û çend karmendî zî est ê. Meslegê klasîkî yenê musnayîş, la derheqê cinî û hişmendîyê cinî de çîyêk çin o. Bi rastî, ma do her çî sifir ra dest pêbikerê. Da semedê ma zehmet bo, la ma do serbikewê.

	 

	'Dimayê 47 serran DEM Partî şaredarî bi dest kerd'

	 

	Xerîbe vat ke dimayê 47 serrî Curnê Reş şaredarî bi dest kerda û vat: “Cinî zaf bîyê şermok, hema vajê qet qisey nêkenê. Bi muracat û cigêrayîşê ke ma demê weçînayîşî de kerd, bi kêmî ma nê çî ant. Ma înan rê qalê hişmendîyê cinî û cayê cinî komelî de kerd. Nika cinî yenê şaredarî û ma reyde pêvînayîşan kenê. Serê problemanê xo de qisey kenê û çaya ma şimenê. Cinî zanê ke destê ma ra çi bêro ma do seba înan bikerê.”

	 

	'Ma do bibê şaredarîyêk nimûne'

	 

	Xerîbe wina qedêna: “Roja yewine de şaredarî de qelebalixêk virazîya. Şar reya ewil zerreyê şaredarî vîna û no zî seba şarî bî keyfweşîyêk pîl. Nika xeylêk reyî yenê şaredariyê û wazenê ma reyde pêvînayîş bikerê. Nê demê peyîn de ma tabelayê bi kurdkî daliqinayî û rayaumûmî ra cewabêk pozîtîf girewt. Berê ma her tim şarê ma rê akerde yo. Reyan wexto ke ez kombîyayîşî de ya, cinî yenê verê mi. Ez o wext kombîyayîş qedênena û şina verê înan. Waştişê înan goşdarî kena, hewl dana çareser bikerî û agêrena kombîyayîşê xo. Şar her çîyo baş heq keno. Wexto ke mabêne şaredarî û şarî de birnayîş bibo, tu wext nêeşkeno bi komelî reyde entegre bibo. Ma do tu wext têkilîyê xo yê şarî reyde nêbirnê. Şar vajo çi rast o û ma amade yê ke  xizmetê tewr baş şarê xo rê bikerê. Ma do mîyanê 5 serran de Curnê Reşî bikerê şaredarîyêk nimûne."