Zîndanê Amedî de 32 tepişteyî werd ra jehrî bîyî

2024-06-24 14:15:40


	 

	 

	AMED - Kampûsê Zîndanê Amedî de 32 tepişteyî semedê werdî jehrî bîyê û înan wedarnayê nêweşxane. Baroyê Amedî, OHD û ÎHDyî vengdayîşê selahîyetdaran kerdî ke wezîfeyê xo ca bîyarê. 

	 

	Baroyê Amedî, şubeyê Komeleya Huqûqnasê semedê Azadîye (OHD) û Komeleya Heqê Merdiman (ÎHD) yê Amedî, bi eşkerayîyêke nuşteyî neql kerd ke Zîndanê Kampûsê Amedî de tepişteyî seba werdî jehrî bîyê. Sazgehan hesabê xo yê medya dîjîtale ser de derheqê babete de nuştî. Sazgehan dîyar kerd ke 23yê hezîrane de agahîya jehrîbîyayîşê tepişteyan înan rê ameyo û endamê înan şîyê serdayîşê zîndanî. 

	 

	Eşkerayîye de wina ame vatiş: “Semedê sebebê roşanî, nêzdîyê 10 rojî yo problem werdî de est o. Mîyanê nê demî de hedîseyê emelbîyayîşî zêde bîyî. Werdê ke 23yê hezîrane de dayê tepişteyan (kerga şnîtzel) boye ci ra ameyo. Bêmabêne awe ameya birnayîş û awa ke yena veradayîş zî gemar a. 32 tepişteyê kampûsî seba virtişî û zerrîqelibnayîşî sewqê nêweşxaneyî ameyî kerdiş. Dimayê ke tedawîya înan ameya kerdiş, tepişteyan ancî berdê zîndan.” 

	 

	Eşkerayîye de ame dîyarkerdiş ke ganî werdişê pakî semedê tepişteyan bêro dayîş û weşîya tepişteyan bêro fikrnayîş û ame vîrardiş ke do 14ê gulane de 2024 de zî ancî hedîseya jehrîbîyayîşî eynî zîndan de vejîyayo. Sazgehê ke eşkerayîye de veng selahîyetdaran kerdî ke seba reyke bîn hedîseyê wina nêqewîyê ganî berpirsiyarî û wezîfeyê xo ca bîyarê.